Përsëritja e vazhdueshme e të njëjtës kërkesë apo ngritja e zërit nuk janë gjithmonë mënyrat më efektive për ta bërë një fëmijë të dëgjojë. Ekspertët theksojnë se mënyra se si prindi komunikon mund të ndikojë drejtpërdrejt në vëmendjen dhe reagimin e fëmijës.
Fëmijët përballen çdo ditë me shumë informacione dhe udhëzime, ndaj kërkesat e shumta njëherësh mund t’ua vështirësojnë përqendrimin. Për këtë arsye, prindërit këshillohen të përdorin komunikim më të qartë, të shkurtër dhe të përshtatur me moshën e fëmijës.
Mos jepni shumë udhëzime njëherësh
Në vend që t’i kërkoni fëmijës të fikë televizorin, të ndërrohet, të lajë dhëmbët dhe të bëhet gati për gjumë në të njëjtën kohë, ekspertët sugjerojnë që udhëzimet të jepen një nga një.
Pasi fëmija të përfundojë një detyrë, mund t’i jepet udhëzimi tjetër. Në këtë mënyrë, kërkesat janë më të lehta për t’u kuptuar dhe zbatuar.
Flisni shkurt dhe drejtpërdrejt
Një kërkesë e gjatë mund të bëjë që fëmija të humbasë vëmendjen para se të arrijë te pjesa kryesore e mesazhit.
Mos e përsëritni të njëjtën kërkesë pa fund
Kur një prind e përsërit të njëjtën kërkesë shumë herë, fëmija mund të mësohet të mos reagojë derisa udhëzimi të përsëritet disa herë.
Ekspertët sugjerojnë që kërkesa të bëhet qartë dhe të shoqërohet me pasoja të kuptueshme e të qëndrueshme kur fëmija nuk bashkëpunon. Po aq i rëndësishëm është edhe vlerësimi kur ai reagon menjëherë.
Një fjali e thjeshtë si “Faleminderit që më dëgjove” mund të ndihmojë në përforcimin e sjelljes pozitive.
Kthejeni dëgjimin në lojë
Dëgjimi mund të ushtrohet edhe përmes lojës.
Gjatë një shëtitjeje, prindi mund ta nxisë fëmijën të dallojë tingujt e zogjve, erës apo natyrës. Edhe këngët për fëmijë mund të përdoren për të diskutuar rreth asaj që dëgjojnë dhe kuptojnë.
Kushtojini vëmendje të plotë
Fëmijët e vërejnë kur prindi nuk është plotësisht i përqendruar tek ata.
Nëse fëmija po tregon diçka që e konsideron të rëndësishme, prindi këshillohet të shmangë shpërqendrimet, të vendosë kontakt me sy, të tregojë se po e dëgjon dhe të bëjë pyetje.
Në këtë mënyrë, fëmija jo vetëm ndihet i dëgjuar dhe i vlerësuar, por mëson edhe nga shembulli i prindit se si duhet të dëgjojë të tjerët.
