Banorë të Kompleksit Mangalem 21, në rrugën “Ali Demi” në Tiranë, kanë ngritur shqetësime pas vendosjes së një trau elektronik nga kompania e administrimit “Tirana Administrim”, duke pretenduar se vendimi është marrë pa dijeninë dhe miratimin e të gjithë banorëve.
Sipas banorëve, trau është instaluar në një rrugë që, sipas tyre, është pronë publike dhe shërben si kalim për këmbësorët, por edhe për automjetet në rast nevoje. Ata pretendojnë se kompania ka argumentuar se vendimi është mbështetur nga shumica e banorëve, por theksojnë se një godinë e tërë, Njësia 10 me 63 familje, nuk është njoftuar fare dhe është informuar vetëm përmes një postimi në rrjetet sociale.
Banorët shprehen se një kompani administrimi është kontraktuar për administrimin e pronës së përbashkët të kompleksit dhe jo për të ndërmarrë investime apo për të kufizuar lëvizjen në një rrugë që ata e konsiderojnë publike.
Lexo edhe:
“Po vendosen kufizime mbi lëvizjen e banorëve sipas interesit të një pakice, në një hapësirë ku administrimi nuk ka juridiksion”, shprehen ata.
Një tjetër shqetësim i ngritur lidhet me situatat e emergjencës. Sipas banorëve, ekziston frika se ambulancat, policia apo zjarrfikësja mund të përballen me vonesa nëse hyrja mbetet e bllokuar dhe duhet pritur ndërhyrja e administrimit për hapjen e traut.
Banorët kërkojnë transparencë të plotë mbi dokumentacionin që ka shërbyer si bazë për vendosjen e traut, si dhe verifikimin nga institucionet kompetente nëse rruga ku është instaluar barriera është pronë publike dhe nëse janë respektuar procedurat ligjore për një ndërhyrje të tillë.
