Ndërkohë që na ndajnë pak orë nga dorëzimi i listave të kandidatëve për deputetë në Komisionin Qendror të Zgjedhjeve, kryeministri Edi Rama nga selia e PS, zbuloi emrat e udhëheqësve të listës në qarqe.
Rama u shpreh se në ndryshim nga zgjedhjet e kaluara këtë herë kanë zgjedhur që në krye të listës të vendosin emra të rinj, duke u dhënë gjithashtu edhe grave një vend të veçantë.
Në Shkodër e parë në listë është Edona Bilali, pedagoge e Ekonomisë. Vendin e parë në Vlorë kreu i qeverisë ia ka besuar ish-drejtorësh së Tatimeve në këtë qytet, Pranvera Resulaj.
Listën e Tiranës do e udhëheqin dy prurjet më të reja në PS, të cilat u prezantuan me shumë bujë. Inxhinierja Luljeta Bozo dhe Shefja e Infektivit Najada Çomo kryesojnë kështu kryeqytetin.
Vendin e parë në Kukës e merr gjithashtu një emër i ri mes socialistëve, Greta Duraku, e angazhuar në sektorin privat. Në Korçë listën do e kryesojnë Eni Zake, pedagoge dhe anëtare e Këshillit Bashkiak.
Për Fierin, duket se është bërë përjashtim. Listën në këtë qark e kryeson zv. kryeministri Erion Braçe, një ndër figurat më të vjetra të PS.
Durrësin dhe Elbasanin, Rama ia ka besuar dy ministreve të reja. E para në listën e socialistëve në Elbasan do të jetë ministrja e Arsimit, Evis Kushi dhe në Durrës ministrja e Bujqësisë, Milva Ekonomi.
