Zjarri që përfshiu kompleksin “Arlis” pranë “Farmacisë 10” në Tiranë nuk është më thjesht një incident, është një alarm i fortë për neglizhencën që fshihet pas fasadave moderne të ndërtimeve.
Policia ka shpallur në kërkim ndërtuesin Armand Lilo, duke e vendosur në qendër të hetimeve për kushtet dhe standardet e sigurisë në objekt. Në të njëjtën kohë, janë arrestuar administratori i pallatit dhe menaxherja e “Big Market” ku dyshohet se shpërtheu zjarri.
Mungesë masash sigurie, shkelje të rregullave bazë dhe një zinxhir neglizhencash që mjaftoi për të kthyer një ambient të përditshëm në një vatër rreziku për jetën e banorëve.
Lexo edhe:
Flakët, që sipas hetimeve paraprake nisën në ambientet e biznesit teksa digjeshin kartonat pas mbylljes së turnit, u përhapën me shpejtësi në godinë, një tregues i qartë se diçka nuk ka funksionuar siç duhet, qoftë në ndërtim, qoftë në administrim.
Ky rast nuk lë vend për justifikime. Kur standardet shkelen dhe kontrolli mungon, pasojat nuk vonojnë. Dhe këtë herë, Tirana pa nga afër se sa pak mjafton që një neglizhencë të kthehet në kërcënim serioz.
Ndërkohë, policia vijon kërkimet për kapjen e Armand Lilos, ndërsa hetimet pritet të thellohen për të zbuluar nëse pas këtij zjarri fshihen edhe përgjegjësi të tjera. Ky nuk është vetëm një rast penal, është një provë e hapur për mënyrën si ndërtohet, menaxhohet dhe mbikëqyret siguria në qytet.
