Pontevedra, Spanjë – Biznesmeni i njohur shqiptar, Nikolin Janina, pronar i kompanisë “Porcelanosa” në Tiranë dhe profesor matematike në Universitetin e Tiranës, është paraqitur para Gjykatës së Pontevedrës. Ai akuzohet për përfshirje në trafikimin e 54 kilogramëve heroinë të kapur në vitin 2016 gjatë një operacioni policor në qytetin Tui.
Janina, i cili ka edhe shtetësi spanjolle dhe zotëron një kompani qeramike në Valencia me rreth 80 punonjës, mohoi akuzat, duke theksuar se marrëdhëniet e tij me personat e përfshirë ishin vetëm miqësore e profesionale. “Kam qenë pjesë e disa takimeve dhe udhëtimeve me ta, por ato ishin të natyrës sociale, jo kriminale,” deklaroi ai para trupit gjykues.
Në seancë, ai u mbrojt nga avokatja spanjolle Carmen Ventoso, e cila kërkoi lirimin e klientit të saj duke e konsideruar plotësisht të pafajshëm. Ndërkohë, prokuroria e sheh Janinën si një nga drejtuesit e grupit dhe ka kërkuar tetë vite burg. Në dosjen hetimore janë përfshirë edhe komunikime të koduara me anë të një telefoni Blackberry, të cilat policia i interpreton si prova të trafikut të drogës.
Lexo edhe:
Janina kujtoi se për disa vite kishte qëndruar në Shqipëri, pasi nuk kishte marrëveshje ekstradimi me Spanjën. Vetëm pas nënshkrimit të traktatit të ri, në vitin 2022, ai vendosi të paraqitej vetë para autoriteteve spanjolle. Sipas tij, qëndrimi në Tiranë ishte i lidhur edhe me detyrimet ndaj familjes dhe bizneseve të tij.
Biznesmeni është i njohur në Shqipëri dhe Spanjë jo vetëm për aktivitetin tregtar, por edhe për përfshirjen në fushën akademike. Ai shpjegoi se ka qenë i pranishëm në panaire ndërtimi dhe evente profesionale në Barcelonë e Valencia, ku shpesh ishte i shoqëruar nga arkitektë shqiptarë, të ftuar nga kompania që përfaqësonte.
Procesi gjyqësor do të vazhdojë më 31 tetor, kur pritet të dëgjohen dëshmitarë të tjerë. Gjykata ka njoftuar se në sallë do të jetë i pranishëm edhe një përkthyes në gjuhën shqipe, ndërsa vendimi përfundimtar pritet të përcaktojë fatin e biznesmenit shqiptar.
