Gazetari Osman Stafa përmes një denoncimi në rrjetet sociale ka ngritur një çështje që lidhet me konfliktin e interesit në proceset e vlerësimit akademik në Fakultetin e Mjekësisë.
Stafa ka publikuar në Facebook një procesverbal provimi ku pedagogu, pjesë e komisionit, ka vlerësuar me notën 10 studentin që rezulton të jetë djali i tij.
Sipas Stafës, rasti është tashmë i referuar në Prokurorinë e Tiranës, ndërsa ai ngre pyetje mbi objektivitetin e prindit në vlerësimin e fëmijës, barazinë mes studentëve dhe mungesën e një rregulloreje që të ndalojë praktika të tilla.
Lexo edhe:
Në thelb, thotë gazetari, nuk bëhet fjalë vetëm për një notë në letër, por për standarde që përcaktojnë cilët mjekë do të mbajnë nesër në dorë jetët e pacientëve, duke qenë se emërimet bëhen në bazë të mesatares.
Postimi i Osman Stafës
Në një procesverbal provimi të Fakultetit të Mjekësisë, pedagogu vlerëson djalin i tij.
Rasti qënka referuar në Prokurorinë e Tiranës për konflikt interesi.
Nuk dua të paragjykoj: djali mund ta ketë merituar realisht notën 10. Por fakti që babai i tij ishte pjesë e komisionit e zhbën vlerësimin real.
Pyetje:
A mund të jetë një prind objektiv në vlerësimin e fëmijës së tij?
A nuk duhej që vlerësimi të bëhej nga një pedagog tjetër, për të shmangur çdo dyshim?
A është kjo e drejtë në raport me studentët e tjerë?
A ka pedagogë të tjerë mjekë, që vlerësojnë fëmijët e tyre, apo ky është rast i mbyllur?
A lejohet një praktikë e tij dhe a konsiderohet normale nga Fakulteti i Mjekësisë?
Dihet që shumë mjekë, duan që fëmijët të jenë trashgimtarë të profesionit. Por nëse s’ka, pse nuk e ka vendosur një rregullore Fakulteti, që ata mjekë që kanë fëmijët e tyre studentë të mjekësisë, s’mund t’i vlerësojnë ata.
Sepse kur hapet nesër vendi i punës, mesatarja luan rol vendimtar në punësim. S’ka lidhje me rastin. Por pse një djalë apo vajzë e një mjeku, merr 10-të (ndoshta të pamerituar) dhe ai studenti tjetër që e merr me meritë 9-ën, të jetë pas këtij të parit në radhën për punësim. A është e drejtë kjo?
Dhe vetë drejtuesit e Fakultetit të Mjekësisë (firmat në fund të letrës) e legjitimojnë këtë praktikë.
Këto nuk janë thjesht “nota” në letër. Janë standarde që përcaktojnë nesër cilët mjekë do të mbajnë në dorë jetët e pacientëve. Ky është halli im!
