Qendra ALERT ka ngritur një alarm publik mbi mënyrën e tregtimit të mishit të pulës në disa rrjete të mëdha marketesh në Tiranë. Në një rast konkret të dokumentuar në një prej pikave të Big Market, janë konstatuar fileto, kofshë dhe krah pule të ekspozuara në vitrinat frigoriferike pa asnjë etiketë.
“Nuk ka asnjë të dhënë për origjinën, importuesin, tregtarin, apo nëse mishi është shkrirë më parë. Pse konsumatorët nuk kanë të drejtë të dinë se për çfarë po paguajnë?”, pyet Qendra ALERT.
Sipas kësaj qendre, një pjesë e madhe e rrjeteve tregtare i tregtojnë në të njëjtën mënyrë produktet e mishit të pulës, pa asnjë informacion të detajuar dhe pa transparencë.
“Është viti 2025, por ende tregtohet si në 2005 apo 1995. Deri kur?”, thuhet në denoncimin publik, i cili paralajmëron se praktika të tilla jo vetëm cenojnë të drejtën e konsumatorit për informim, por përbëjnë edhe rrezik për shëndetin publik.
