Plasin skenarët për shkarkime, hetime dhe përmbysje mandatesh në kampin e Partisë Socialiste. Vetëm pak javë pas zgjedhjeve të 11 majit, një valë dyshimesh dhe akuzash të forta po përfshijnë disa nga deputetët më të votuar të mazhorancës. Kandidati i PD për zgjedhjet e 11 majit Aulon Kalaja ka hedhur benzinë mbi zjarrin e krizës elektorale, duke deklaruar publikisht se dy deputetë të rinj të PS-së nuk do të jenë më pjesë e Kuvendit në shtator, pasi sipas tij kanë përfituar mandate përmes ndihmës direkte nga krimi i organizuar. “Dy deputetë të Partisë Socialiste nuk do jenë më në legjislaturën e shtatorit nga këta të rinjtë që u zgjodhën tani.
Këta po i bëjnë makiazh Edi Ramës. E lënë Edi Ramën të fitojë zgjedhjet pastaj i zëvendësojnë dy deputetë që kanë lidhje me krimin, i fusin dy deputetë të tjerë. Ata do rrëzohen sepse janë ndihmuar nga krimi i organizuar”, tha Kalaja në një studio televizive. Sipas tij, këto mandate janë të njollosura dhe nuk përfaqësojnë vullnetin real të votuesve, por janë rezultat i trukimeve zgjedhore dhe ndikimit kriminal. Kalaja shpreh shqetësimin se në këtë skemë janë përfshirë persona që nuk kanë asnjë kontribut publik dhe që janë katapultuar në Parlament me rezultate të pabesueshme. “Ke mandate me flamur të kuq. Njerëz pa kontribut publik, njerëz që nuk kanë asnjë lloj lidhje me realitetin as me votën, marrin më shumë vota se Edi Rama, apo jo? Njerëz që zgjedhjet e kaluara kanë marrë 2.500 vota, tani marrin mbi 21.000 vota”, theksoi Kalaja.
Hetimet e SPAK
Prokuroria e Posaçme (SPAK) ndodhet në një fazë të avancuar të hetimeve për 39 dosje të nxehta që lidhen me krimet zgjedhore të ndodhura përpara dhe gjatë procesit të votimit për zgjedhjet të 11 majit. Burime bëjnë me dije se këto dosje përmbajnë dëshmi dhe dokumente komprometuese që implikojnë figura të rëndësishme të politikës shqiptare, përfshirë emra të njohur në nivel lokal dhe kombëtar, të dyshuar për përfshirje në manipulime elektorale dhe bashkëpunim me grupe kriminale të strukturuara. Në total janë administruar 156 materiale në lidhje me krimet zgjedhore.
Prej tyre, 39 janë regjistruar si procedime penale dhe po hetohen nga prokurorë të posaçëm. Këto çështje përfshijnë një sërë veprash penale, që nga blerja e votës dhe kanosja e zgjedhësve, deri te përdorimi i të dhënave personale në mënyrë të paligjshme dhe keqpërdorimi i administratës publike për qëllime elektorale. SPAK ka vendosur të mos fillojë hetime për 25 kallëzime, pasi në këto raste nuk janë identifikuar elementë të mjaftueshëm për të nisur një procedim penal. Ndërkohë, 24 materiale janë dërguar për kompetencë në prokuroritë e rretheve gjyqësore, për shkak të natyrës lokale të veprave ose për përfshirjen e individëve jashtë juridiksionit të SPAK-ut.
Një material është bashkuar me një dosje ekzistuese, ndërsa 17 raste janë dërguar për verifikim në drejtoritë vendore të Policisë së Shtetit, me qëllim mbledhjen e informacionit shtesë apo kryerjen e veprimeve të para hetimore. Materialet e mbetura ndodhen ende në fazë verifikimi fillestar. Sipas burimeve një pjesë e konsiderueshme e këtyre çështjeve lidhet me përfshirjen e kandidatëve në aktivitete të paligjshme për të siguruar mbështetje elektorale. Dëshmitë e marra deri më tani flasin për një skemë të sofistikuar ku janë përfshirë aktorë të politikës dhe elementë të botës së krimit, që kanë vepruar në bashkëpunim për të ndikuar rezultatin e zgjedhjeve. Dokumente të siguruara nga SPAK tregojnë për raste të organizuara të blerjes së votës në këmbim të favoreve ekonomike, apo dhe punësimeve në administratën publike. Në disa raste, janë evidentuar fakte që tregojnë për përfshirjen e personave me precedentë penalë si ndërmjetësues ose “garantues” të votës në zona të caktuara, sidomos në qarqe ku rezultati i zgjedhjeve ka qenë i diskutueshëm.
