Një punonjës 24-vjeçar i kompanisë Wizz Air në Shqipëri është dënuar nga Gjykata e Tiranës me 6 muaj burg për vjedhjen e një ore “Rolex” me vlerë 20 mijë euro nga bagazhi i një pasagjeri. Ngjarja ka ndodhur më 21 maj 2024, gjatë një fluturimi nga Tirana drejt Athinës.
Sipas akuzës, biznesmeni Kosta Z., pasagjer në këtë fluturim, zbuloi pas mbërritjes në Athinë se ora e tij luksoze mungonte nga bagazhi. Pas denoncimit të bërë në Tiranë, Policia nisi hetimet dhe mori në pyetje punonjësit e përfshirë në procesin e ngarkimit të bagazheve.
Klajdi Q., banues në Krujë, pranoi fajin duke deklaruar se kishte gjetur orën gjatë ngarkimit të bagazheve në avion dhe e kishte fshehur. Në dëshminë e tij, ai pretendoi se ora kishte rënë nga një valixhe dhe se ai e kishte mbajtur për vete, duke e fshehur fillimisht pranë zonës së punës dhe më pas në rrobat e tij.
Lexo edhe:
Pas hetimeve, ora iu kthye pronarit dhe Gjykata e Tiranës e shpalli të riun fajtor për “vjedhje duke shpërdoruar detyrën”. Për shkak të moshës dhe mungesës së precedentëve penalë, dënimi prej 9 muajsh u reduktua në 6 muaj për shkak të gjykimit të shkurtuar.
Ngjarja ngre shqetësime mbi sigurinë dhe ndershmërinë në menaxhimin e bagazheve në aeroportet shqiptare.
