Në një rrëfim prekës, aktorja e mirënjohur dhe shumë e dashur për publikun Margarita Xhepa ka folur për njohjen me të shoqin Xhavit Xhepa, aktor dhe këngëtar.
E ftuar në emisionin “N’konfidencë” në RTSH ajo deklaroi se e kishte njohur atë fillimisht si një shok, duke qenë se bota e artit i kishte bërë bashkë shumë herët.
Por shkëndija mes tyre lindi pak kohë më pas kur ajo bashkë me dy aktorë të tjerë u dërguan në teatër, ku Xhavit Xhepa ishte pjesë, për të formuar trupën e estradës. Veç të tjerash ajo u tërhoq prej fisnikërisë që rrezatonte Xhaviti dhe sjelljes që ai kishte në raport me të tjerët.
“Ne ishim së bashku në estradë. Mua më çuan nga teatri për të krijuar trupën e estradës. Njiheshim si shokë. Aty u njohëm akoma dhe më afër. Ndihej që vinte nga një familje fisnikësh me një emër të mirë. Dallohej edukata, thjeshtësia. Ishte edhe aktor edhe këngëtar. E donte edhe ai artin. Që në fëmijë hipte në fik dhe këndonte. Na u puq pasioni për artin. U njohëm si shokë në fillim pastaj e pëlqyem njëri tjetrin. Kishte disa gjëra shumë të bukura dhe elegante. Nuk vinte të bërtiste apo të zihej me njeri. Me raport korrekt me njerëzit. Të linte përshtypje shumë të mirë”, shprehet ajo.
Fakti që ndanin të njëjtin profesion i lidhi edhe më shumë së bashku dhe ai ishte kritiku më i mirë i saj, pasi në fjalët dhe vërejtjet e tij nuk mund të dyshonte kurrë.
‘Ai ka qenë ndihma kryesore për mua. Kemi ndihmuar njëri tjetrin. Kur bëja provën gjenerale i thoja dua të jesh në sallë. Të më jepte kritikat. I bënte vërejtjet tamam. Dhe i thoja hajde më shiko. Ka qenë ndihmë e madhe dhe kemi bashkëpunuar me njëri tjetrin. Ai ishte në teatër dhe nuk mund të shkëputej. Kishin shfaqje dy herë në ditë. Në jetë kemi dalë rastësisht”, thotë Margarita Xhepa.
Talentin e jashtëzakonshëm të prindërve e trashëgoi vetëm njëri nga tre djemtë e tyre, aktori i njohur Ndriçim Xhepa. E ëma Margarita Xhepa tregon në RTSH se i biri kishte shfaqur që në fëmijëri karakteristika të veçanta.
“Fëmijët i kam marrë edhe me vete. Ndonjëherë kam fjetur edhe me ta bashkë. Fëmijët kanë bërë zgjedhjet e tyre. Gjithmonë kemi dashur të ecin aty ku kishin prirjet dhe dëshirën e tyre. Ndiçimin e shikonim edhe në tavolinë kur hanin ndryshonte nga dy të tjerët. Nëse ia mbyllnin ne derën dilte nga dritarja si i thonë. Kam pasur role edhe në teatër dhe në kinema me Ndriçmin”, tregon ajo.
Vetëm ai në një intervistë të shkurtër për emisionin “N’konfidencë” tregon ndjesitë që ka pasur nga rolet që ka ndarë me të ëmën, gjë e cila ia shtonte akoma më shumë përgjegjësinë në një interpretim, pasi ndodhej përballë një aktoreje të madhe që ishte nëna e tij.
Margarita Xhepa pyetet të tregojë disa emra bashkëpunëtorësh që veçon nga karriera e saj, por e ka të vështirë duke theksuar se asokohe ishte koha e të mëdhenjve që punonin me pasion dhe të mahnisnin në rolet e tyre.
“Ishte koha e të mëdhenjve, e aktorëve të mëdhenj. Erdhën me pasion për teatrin. Kur kam parë “Rrënjë të thella” jam mahnitur nga ata aktorë. Ishin njëri më i mirë se tjetri. Zërin e kam ruajtur. Nuk kam pirë kurrë cigare as pije. Kam pasur kujdes. Kam pasur edhe vështirësi. Kam rritur tre djem. Festivali ishte një vlerësim dhe gëzova shumë”, shprehet aktorja.
/Vip-magazine.al/
