Prokuroria e Posaçme rrezikon të shkundë nga themelet politikën shqiptare. Teksa e gjithë vëmendja këto javë është fokusuar te Parlamenti i ri dhe përjashtimi i Sali Berishës, dje janë dhënë sinjale se mund të kemi zhvillime akoma dhe më të forta. Ambasadorja amerikane Yuri Kim ka bërë disa vizita ditët e fundit në Prokurorinë e Posaçme dhe sipas burimeve po diskutohet për disa dosje tejet sensitive që do të kenë impakt publik kur të finalizohen. Në të njëjtën linjë ka qenë edhe gazetari Artan Hoxha, i cili në bazë të burimeve të tij ka zbuluar detaje nga këto dosje duke deklaruar me bindje të fortë se po planifikohet arrestimi i disa ish-ministrave dhe ish-kryeministrave. Sipas tij i rrezikuar është dhe Sali Berisha. “BKH sapo ka ardhur.
Ka hetime dhe jam thirrur edhe unë për këtë gjë. Në pjesën që unë kam pasur dijeni kam ndihmuar. Dhe e di që ka hetime. Në hetimet që kam parë është hetim që synon të godasë shumë lart. Por mund të arrestojë politikanë të rëndësishëm, ish-kryeministër dhe ish-ministra. Por edhe Berisha nuk është i përjashtuar nga kjo punë. Por edhe këta që janë në detyrë nuk janë të përjashtuar. Ambasadorja po mbulohet që të mbrojë dhe të dëshmojë se prokurorët janë në rrugën e duhur. Ka hetime dhe frika është që më mirë të mos arrestohet një politikan pa prova, sesa e arreston dhe pastaj del i pafajshëm. Ambasada ka momente që e mbështet, se japin mbështetje financiare dhe me projekte, por nuk shkon dot me listë dhe t’u thotë arrestoni këta persona”, tha mes të tjerash Hoxha. Sipas tij, pritshmëritë kanë qenë të shumta për SPAK, por arrestimi i tyre do kohë. Gazetari deklaroi në studion e “Abc Neës” se do ketë zhvillime mjaft të bujshme.
“Shtatori ka qenë me shumë zhvillime politike. Me ngjarje të tjera, apo me përjashtimin e Berishës që thithi shumë vëmendje. Por, tashmë SPAK ka marrë dhe BKH. SPAK u bë për të goditur politikanët e lartë. Dhe për të goditur korrupsionin apo për të goditur lidhje shtet-politike – krim i organizuar duhet kohë. Do shohim rezultate. Nuk është e lehtë që të futen brenda ish –kryeministria, ish-presidente, ish-ministra”, tha Hoxha.
Lexo edhe:
Dosjet e SPAK
Pak ditë më parë gazeta e bëri të ditur se vetëm këtë vit pranë kësaj prokurorie janë regjistruar 264 procedime, prej të cilave 218 janë dosje korrupsioni. Sipas burimeve, bëhet fjalë për padi kryesisht për tenderat. Shumë kompani që skualifikohen pa të drejtë nga gara, i drejtohen SPAK duke denoncuar shumë skandale abuzimesh. Arrestimi i kryebashkiakut të Lushnjes ndodhi pikërisht përmes kësaj skeme. Kompania e skualifkuar bëri padi dhe në bazë të hetimeve u konfirmuan shkeljet. Kjo rrugë po ndiqet dhe me shumë tendera të tjerë me vlera qindra milionë lekë. Ajo që bie në sy është se pjesa dërrmuese e dosjeve kanë të bëjnë me korrupsionin dhe jo me krimin e organizuar. Ndërkohë ajo që u ka futur të dridhurat pushtetarëve është se pranë Byrosë së Hetimit janë stacionuar 3 hetues të FBI.
Vetë ambasadorja amerikane në një intervistë që dha së fundmi e konfirmoi këtë gjë, ndërsa bëri me dije se SHBA ka dhënë deri tani 4 milionë dollarë për forcimin e Byrosë Hetimore. “Deri tani, kemi kontribuar më shumë se 4 milionë dollarë në trajnime dhe pajisje. Mbështetja më e madhe sigurisht është me ekspertizë dhe ka të paktën 2 ose 3 ish-agjentë të FBI-së, ekspertë të vërtetë që kanë përvojë dhe ekspertizë praktike, që janë këtu, të lidhur me ambasadën dhe po ndihmojnë hetuesit e rinj të BKH-së, që të zhvillojnë të njëjtat shprehi, që të mund të jenë agresivë dhe që të jenë të aftë të kryejnë funksionet e tyre”, tha ambasadorja.
