Kartëmonedhat promovojnë trashëgiminë historike kulturore të vendit tonë dhe theksojnë arritjet më të mëdha të shumë personaliteteve të shquara të kombit ndër shekuj.
Deri sot, kartmonedha më e madhë në Shqipëri ka qenë ajo më vlerë 5 mijë lekë, që mban si simbol kryesor Gjergj Kastriotin Skënderbeun, Heroin Kombëtar Shqiptar.
Gjergj Kastrioti-Skënderbeu (1405-17 janar 1468) personifikon një epokë të tërë të historisë kombëtare të shqiptarëve, që mori emrin e tij: luftën më se njëshekullore të tyre kundër vërshimit osman.
Skënderbeu i detyroi të gjitha kohërat të flisnin për të, dhe si i tillë, ai njihet si figura më e rëndësishme shqiptare.
Por nëse do të marrim hierarkine e kartmonedhave në Shqipëri, tashmë ai do të jetë i dyti për nga “vlera”.
Banka e Shqipërisë prezantoi këtë të martë dy kartëmonedha të reja. Bëhet fjalë për kartëmonedhat 1 mijë Lekë dhe 10 mijë Lekë.
Kjo e fundit është një prerje krejtësisht e re në serinë e kartëmonedhave shqiptare. Kartëmonedha 10 mijë lekë mban simbolet e identitetit tonë kombëtar, shoqëruar me autorin e Himnit Kombëtar Aleksandër Stavër Drenova (Asdreni).
“Shtypja dhe hedhja në qarkullim për herë të parë e kartëmonedhës së re të prerjes të lartë me vlerë 10 mijë lekë, përfaqëson në vetvete përshtatjen e strukturës së kartëmonedhave e evoluimin e strukturës së çmimeve dhe pagave, shkallën e zhvillimit të sistemit elektronik të pagave dhe tregues të tjerë që lidhen me tregtimin e parasë”, tha Guvernatori i BSH, Gent Sekjo.
Siç duket Asdreni e ka zbritur nga froni Gjergj Kastriotin, të paktën përkohësisht./Gazeta SHQIP
