Aeroporti i Berlinit po punon për të rikthyer sistemet e regjistrimit dhe pranimit të bagazheve pas një sulmi kibernetik në fundjavë, teksa priten vonesa dhe anulime të mëtejshme të mërkurën, ka thënë operatori i aeroportit në një deklaratë.
Ai është një nga disa aeroportet në të gjithë Europën, të prekur nga ndërprerjet, si pasojë e një sulmi me programin ransomware ndaj ofruesit të softuerit Collins Aerospace, i cili ka prekur dhjetëra fluturime dhe mijëra pasagjerë që nga e premtja.
“Mund të duhen disa ditë të tjera para se aeroporti i kryeqytetit gjerman të ketë përsëri softuer funksional dhe të sigurt, teksa stafi po punon me zell për të përpunuar manualisht pasagjerët, ka thënë operatori BER në një deklaratë. Ofruesi i softuerit “ka thirrur ekspertë të tjerë dhe po punon urgjentisht për të gjetur një zgjidhje”, ka shtuar ai.
