Lulzim Basha i quan trillime e thashetheme deklaratat e Sali Berishës, që në “Foltoren” me gratë demokrate këtë të diel tha se Basha e akuzonte se i kishte vendosur përgjues në zyrë.
“E trishtueshme kur dëgjon sa poshtë ka rënë Sali Berisha. Asnjë trillim, mashtrim, të thash e me the, nuk do ta shndërrojë PD në mburojë të interesave të tij personale”, shkruan Basha.
Berisha tha më herët se kryedemokrati Lulzim Basha nuk i zhvillonte bisedat në zyrën e tij pasi mendonte se i kishin vënë përgjues.
Berisha u shpreh se burimet amerikane i kanë treguar atij se madje Basha i thoshte edhe ambasadores amerikane që të dilnin e të bisedonin jashtë zyrës së tij. Ish-kryeministri shtoi se ai kurrë nuk do ta pranonte Bashën në krye të Opozitës për një mandat të tretë.
“Është një listë gjatë në rrjet me personat e shpallur non-grata në të gjithë botën. Merreni dhe kontrollojeni, nuk është shpallur askush non-grata siç është shpallur Sali Berisha, unë s’i kam kërkuar kurrë ndihmë askujt, ndihma e Zotit, penda ime them unë. Burimet amerikane më thonin se ky i thoshte ambasadores amerikane, hajde të dalim nga zyra se më ka futur Berisha përgjues në zyrë. Të dalim. Por unë nuk e pranoja kurrë atë në krye të Opozitës për një mandat të tretë”, deklaroi Berisha.
