Qindra qytetarë në Lezhë u mblodhën për të ndezur qirinj dhe për të vendosur lule në kujtim të 25-vjeçares Xhuana Nikollaj.
Mes dhimbjes, lotëve dhe heshtjes, të pranishmit nderuan jetën e një vajze të re që u shua tragjikisht, ndërsa pranë fotografisë së saj u panë buqeta lulesh dhe qirinj të ndezur që simbolizonin dhimbjen, por edhe solidaritetin me familjen e saj.
Të afërm, qytetarë dhe përfaqësues institucionesh qëndruan së bashku për disa momente reflektimi, duke kujtuar një jetë të ndërprerë shumë herët dhe duke ngritur zërin kundër dhunës që vazhdon të prekë gra dhe vajza në Shqipëri.
Qindra qytetarë të Lezhës, homazhe për Xhuana Nikollajn:
Atmosfera e homazheve ishte e mbushur me emocione të forta, ndërsa shumë prej të pranishmëve e përjetuan këtë moment si një thirrje për ndërgjegjësim dhe reagim më të fortë shoqëror.
Ngjarja tragjike ndodhi vetëm pak ditë pas Ditës Ndërkombëtare të Gruas, një datë që simbolizon të drejtat dhe dinjitetin e grave, duke e bërë këtë humbje edhe më të dhimbshme dhe duke rikthyer në vëmendje plagën e dhunës ndaj grave.
Ndërkohë partneri i saj, Eraldo Fizi, i cili dyshohet se ishte shkaktari i vetëvrasjes, është ende në kërkim nga Policia, nën dyshimin për veprat penale “Dhunë në familje” dhe “Shkaktim i vetëvrasjes”.
Sipas të dhënave paraprake të hetimit, Fizi ishte kthyer nga jashtë vendit më 9 mars dhe dyshohet se ka shkuar në banesën e ish-bashkëshortes në Tiranë, ku mund të ketë pasur një përplasje mes tyre. Një ditë më pas, në orët e para të mëngjesit të 10 marsit, 25-vjeçarja konsumoi fostoksinë.
Burime nga hetimi thonë se në trupin e saj janë konstatuar edhe shenja dhune në kokë, fytyrë dhe në njërin krah, ndërsa në banesë është gjetur edhe një letër që e reja u kishte lënë prindërve.
Xhuana Nikollaj dhe Eraldo Fizi ishin martuar në qershor të vitit 2025 në Lezhë, por martesa zgjati vetëm rreth tre muaj. Pas ndarjes, 25-vjeçarja ishte zhvendosur në Tiranë për të jetuar me motrat e saj.
Ndërkohë hetimet vijojnë për të zbardhur plotësisht rrethanat që çuan në vdekjen e saj.
