Ashtu sikurse e kishte lënë amanet, homazhet për përcjelljen për në banesën e fundit të studiuesit Moikom Zeqo do të mbahen në Muzeun Historik Kombëtar.
Ceremonia do të mbahet ditën e shtunë nga ora 10:00 deri në orën 14:00.
Studiuesi dhe shkrimtari i njohur, Moikom Zeqo nuk e fitoi dot betejën me sëmundjen e rëndë prej së cilës vuante prej 5 vitesh. Ai u nda nga jeta në moshën 71 vjeçare mëngjesin e së hënës.
Ai është autori i 62 librave me poezi, studime arkeologjike, për historinë e artit, si dhe të nje numri skenaresh për filma kinematografike e televizivë me karakter arkeologjik dhe kulturor.
Krijime të Moikom Zeqos janë përkthyer në gjuhët anglisht, frëngjisht, greqisht, italisht, serbokroatisht, bullgarisht, rumanisht, polonisht, gjermanisht.
