Kandidati i Partisë “Mundësia”, Erald Kapri i renditur i dyti në listën e Tiranës i është përgjigjur kryetarit të Partisë Demokratike, Sali Berisha pasi ky i fundit deklaroi se i kishte ofruar Agron Shehajt kandidimin për Bashkinë e Tiranës në mënyrë që të mos largohej nga PD.
Në një intervistë për Vip Magazine, Erald Kapri i cili do të kandidojë në siglën e partisë së Shehajt, u shpreh se kjo është pikërisht arsyeja pse ky i fundit ka zgjedhur të largohet nga PD, pasi politika nuk mund të jetë pazar.
Lexo edhe:
“Zoti Shehaj e ka bërë të qartë se ikja nga PD nuk ka ndodhur se nuk i dhanë postin që kërkoi. Iku nga PD-ja sepse humbi besimin që PD mund të kthehet në një forcë fituese. Kjo që ka thënë Berisha fakton atë që ka thënë Agroni. Nuk e ka kthyer në Pazar që më jep këtë dhe unë do qëndroj te PD. Kjo nuk është çështje pazari, por parimore”, deklaroi Kapri ndër të tjera.
Çfarë tha Sali Berisha pak ditë më parë?
Kryedemokrati u shpreh se Shehajt i kishte ofruar kandidimi për bashkinë më të madhe në vend, si dhe drejtimi i fushatës së Partisë Demokratike në Tiranë.
“Atij ju ofrua oferta për koalicion me të vetmin qëllim që asnjë votë e elektoratit tonë të mos i mungojë PD në betejë me Ramën. Ai refuzoi. Pajtohet, në një farë mënyre kontribuon me këtë të keqe, ai merr vota si të dëmtojë frontin opozitar. Agron Shehajt i janë bërë të gjitha ofertat. I është ofruar a dëshiron të kandidosh për bashkinë Tiranë? Jo tha, dua më shumë. Iu ofrua drejtimi politik i Tiranës gjatë fushatës”, u shpreh ndër të tjera Berisha disa ditë më parë.
