Franca ka urdhëruar Apple të ndalojë shitjen e iPhone 12 për shkak të rrezatimit elektromagnetik. Mbikëqyrja franceze ANFR ka informuar Apple për vendimin e saj për të ndaluar shitjen e iPhone 12 pas testeve të kryera dhe që gjithashtu të rregullojë telefonat aktualë.
ANFR i ka kërkuar Apple që nëse nuk mund ta zgjidhë problemin nëpërmjet një përditësimi të softuerit, duhet të tërheqë çdo iPhone 12 të shitur ndonjëherë në vend. iPhone 12 u lëshua për herë të parë në shtator 2020 dhe ende shitet në mbarë botën.
Apple i tha BBC-së se po kundërshtonte kërkesën e ANFR-së dhe tha se i kishte ofruar rregullatorit rezultatet laboratorike nga vetë gjigandi i teknologjisë dhe palët e treta, të cilat tregojnë se pajisja është në përputhje me të gjitha rregullat përkatëse.
Lexo edhe:
Ministri dixhital i Francës, Jean-Noel Barrot është shprehur se vendimi ishte për shkak të niveleve të rrezatimit mbi pragun e pranueshëm, sipas Reuters. Ai pretendon se një përditësim i softuerit do të mjaftonte për të zgjidhur problemin e rrezatimit, të cilin kompania amerikane e shet që nga viti 2020.
“Apple pritet të përgjigjet brenda dy javësh. Nëse nuk e bëjnë, unë jam gati të urdhëroj një tërheqje të të gjithë iPhone 12 në qarkullim. Rregulli është i njëjtë për të gjithë, duke përfshirë gjigantët dixhitalë,” shtoi ai.
Bashkimi Evropian ka vendosur kufijtë e sigurisë për vlerat SAR të lidhura me ekspozimin ndaj telefonave celularë. Mbikëqyrësi francez tani do t’ua përcjellë gjetjet e tij rregullatorëve në shtetet e tjera anëtare të BE-së. Në vitin 2020, Franca zgjeroi rregulloret që u kërkonin shitësve me pakicë të shfaqin vlerën e rrezatimit të produktit në paketim.
