Aeroporti Ndërkombëtar i Tiranës (TIA) ka shënuar një tjetër rekord në trafikun ajror, duke përpunuar afro 1.65 milionë pasagjerë vetëm gjatë muajit korrik.
Sipas të dhënave të publikuara nga Tirana International Airport, trafiku i pasagjerëve gjatë korrikut u rrit me 28.1% krahasuar me të njëjtën periudhë të një viti më parë, ndërsa rritja në terma vjetorë arriti në 19.4%.
Një rekord i veçantë u regjistrua më 27 korrik, kur aeroporti përballoi brenda vetëm 24 orëve 58,805 pasagjerë dhe 329 fluturime komerciale.
Lexo edhe:
Përmasat e rritjes bëhen edhe më të dukshme nëse shifrat krahasohen me periudhën para pandemisë. Vetëm gjatë korrikut, TIA përpunoi një numër pasagjerësh që përfaqëson rreth 50% të gjithë trafikut të regjistruar gjatë vitit 2019.
Fluksi i lartë i udhëtarëve ka sjellë njëkohësisht ngarkesë të shtuar për stafin dhe strukturat që operojnë në aeroport, veçanërisht gjatë ditëve me temperatura të larta të sezonit veror.
Rritja e fortë e trafikut në Tiranë është evidentuar edhe në nivel europian. Këshilli Ndërkombëtar i Aeroporteve për Europën (ACI Europe), në raportin për trafikun aeroportual të prillit 2026, e renditi Tiranën si aeroportin me rritjen më të shpejtë mujore në kategorinë e aeroporteve të mëdha.
Shifrat konfirmojnë zgjerimin e ndjeshëm të trafikut ajror në Shqipëri dhe rolin gjithnjë e më të rëndësishëm të Tiranës në hartën europiane të transportit ajror.
