Efektivët e forcave “Shqiponja” në Sarandë janë ndeshur mbrëmjen e djeshme me një përplasje të papritur në një lokal në qendër të këtij të qyteti. Efektivët e policisë shkojnë në një nga lokalet në rrugën Turizëm–Kanali i Çukës në Sarandë, duke kërkuar uljen e muzikës.
Por, forcat “Shqiponja”, kanë hasur në kundërshtimin e personit në fjalë, i cili paraprakisht raportohet se është kryekamerieri i lokalit, të cilit ende nuk i është zbardhur identiteti. Kryekamerieri nuk ka pranuar të ulë muzikën pasi ka pretenduar se është brenda orarit të lejuar.
Por situata ka agravuar në momentin kur kryekamerieri ka shtyrë me duar një prej efektivëve. Në këtë moment kanë ndërhyrë edhe efektivët e tjerë dhe kanë marrë nga krahët për ta shoqëruar personin që i kundërshtoi.
