Duke nisur nga sezoni i ardhshëm veror në ishullin idilik mesdheta në gjirin e Napolit, Kapri, do të zbatohen rregulla më të rrepta për turistët: vetëm grupet e organizuara të turistëve deri në 40 persona do të lejohen të zbresin në breg, sipas agjencisë së lajmeve Ansa.
Në përputhje me këtë, këshilli bashkiak i ishullit miratoi njëzëri rregulloret përkatëse. Këto gjithashtu parashikojnë që shoqëruesit e grupeve me më shumë se 20 persona nuk lejohen më të përdorin altoparlantë gjatë drejtimit të tureve në qytetin kryesor të Kaprit. Në vend të kësaj, ata duhet të komunikojnë me turistët përmes kufjeve me radio.
Kjo ka për qëllim të mbrojë nga zhurma dhe shqetësimet njerëzit e tjerë në ishull – veçanërisht banorët vendas. Në të ardhmen, drejtuesit e grupeve turistike do të lejohen të identifikohen si të tillë me anë të një katele të varur në qafë – dhe të mos tërheqin më vëmendjen për shembull me çadra ose pëlhura të lidhura në shkopinj. Ata gjithashtu duhet të sigurojnë që grupet e tyre të qëndrojnë së bashku dhe të jenë të sigurta gjatë gjithë rrugës dhe të mos zënë shumë hapësirë në rrugët e sheshet e qytetit.
Kapri në Gjirin e Napolit është një nga destinacionet më të njohura dhe më të vizituara të pushimeve në Itali. Ishulli njihet për vilat me muret e bardha rrethuese, bregun shkëmbor me gjiret dhe hotelet luksoze, veçanërisht në qytetin kryesor. Në sezonin kryesor, numri mesatar i vizitorëve vlerësohet deri në 50,000 në ditë.
Ishulli i vogël ka një popullsi prej vetëm 13,000 banorësh. Veçanërisht në verë, portet, pikat e vëzhgimit dhe monumentet historike janë rregullisht të mbipopulluara. Lorenzo Coppola, kreu i shoqatës lokale të tregtisë Ascom Confcommercio Capri, mirëpriti kufizimet që ka miratuar tani këshilli lokal.
Këto janë një “mjet i domosdoshëm për lehtësimin e barrës” në zonat e mbngarkuara që do t’u rikthenin rrugëve e trotuareve të ishullit hapësirën që u takon.
