Dy personazhe mjaft të njohur në rrjetet sociale, që kanë gjetur hapësirë edhe në mediat shqiptare, Genard Hajdini dhe motra e tij Sonida, ndodhen të shtruar në spitalin psikiatrik në Tiranë, dhe prokuroria me rekomandim të mjekëve ka hapur një hetim pas publikimit të një video shqetësuese në Instagram.
Genard Hajdini publikoi pamje të papërshtatshme të motrës së tij, çka nxiti strukturat sociale së bashku me një staf mjekësor dhe efektivë policie të bëjnë vlerësimin e gjendjes së Sonida Hajdinit.
Sipas një njoftimi zyrtar të Ministrisë së Shëndetësisë, thuhet se gjatë intervistimit, ajo u shpreh se videoja kishte si qëllim të bëhej virale dhe jo elementë dhune apo qëllime dashakeqësie”. Videoja është fshirë nga vetë Genardi pas urdhrit të policisë.,
Lexo edhe:
Ministria zbulon se edhe para dy javësh, ata kishin qenë në spitalin e Shëndetit Mendor dhe mjekët i kishin injektuar medikamente si dhe trajtim ambulator, i cili ofrohej nga një kujdestare e vendosur nga të afërmit.
Vëlla e motër do të jenë në monitorim nga autoritetet – thotë ministria “ku do të kërkohet edhe mbështetje nga organet kompetente për hetime të mëtejshme, për shkak të dyshimit për konsumimin e veprës penale të shfrytëzimit të një personi me aftësi ndryshe”.
”Pas publikimit në faqen e Instagram-it të shtetasit G.H., ku shfaqej në mënyrë të papërshtatshme motra e tij, shtetasja S.H., menjëherë nga strukturat sociale vendore të Njësisë Administrative nr. 2, së bashku me stafin mjekësor të Qendrës Shëndetësore nr. 1 dhe oficerët e policisë të Komisariatit nr. 1, u bë vlerësimi i gjendjes së shtetases S.H. Gjatë intervistimit, u shpreh se videoja kishte si qëllim ndjekjen virale të vetë personazhit dhe jo elementë dhune apo qëllime dashakeqësie. Videoja është fshirë nga vetë G.H., pas urdhrit të menjëhershëm të policisë.
Strukturat shëndetësore bënë gjithashtu të mundur edhe injektimin e medikamenteve shëndetësore, pasi nga qëndrimi para dy javësh në Spitalin e Shëndetit Mendor në Tiranë, ishte lënë përgjegjësi për trajtim ambulator, i cili ofrohej nga një kujdestare e vendosur nga të afërmit e dy personave.
Aktualisht, ata ndodhen të shtruar për një shërbim më të specializuar mjekësor në spitalin psikiatrik të Tiranës, ndërsa nga ana e organeve kompetente materialet janë referuar në prokurori, sipas edhe rekomandimit tonë.
Struktura e NJNVR-së së Njësisë nr. 2, së bashku me Drejtorinë e Mbrojtjes Sociale në Bashkinë e Tiranës dhe Drejtorinë Rajonale të Shërbimit Social Shtetëror të Qarkut Tiranë, do të mblidhen për hartimin e planit të masave për monitorimin e vazhdueshëm të dy personave me lidhje gjaku (motër dhe vëlla), ku do të kërkohet edhe mbështetje nga organet kompetente për hetime të mëtejshme, për shkak të dyshimit për konsumimin e veprës penale të shfrytëzimit të një personi me aftësi ndryshe.”, thuhet në njoftimin e Ministrisë së Shëndetësisë.
