Gazetari i njohur i ekonomisë, Klodian Tomorri, ka hedhur akuza të forta ndaj Raiffeisen Bank, duke e akuzuar atë për manipulim të opinionit publik me fushatën e saj të fundit për “kreditë e buta”. Sipas Tomorrit, banka nuk kontribuon financiarisht në këtë skemë dhe përkundrazi, përfiton prej saj në kurriz të buxhetit të shtetit dhe taksapaguesve shqiptarë.
Në një reagim publik të publikuar në rrjetet sociale, gazetari shkruan se Raiffeisen po përpiqet të pastrojë imazhin pas skandaleve të fundit të raportuara në media lidhur me abuzimet në sektorin e kredidhënies.
“Raiffeisen ka nxituar të shpërlajë imazhin e saj duke bërtitur publikisht se po mbështet familjet e reja me kredi të buta. Por a heq para nga fitimet e veta? Jo. Ata që mbështesin familjet janë taksapaguesit shqiptarë, jo banka,” – shkruan ai.
Lexo edhe:
Tomorri thekson se banka nuk ka asnjë kontribut real në programin e kredive të buta, ndërsa fiton nga interesat dhe tarifat që mbulohen nga fondet publike. Ai ironizon se “Raiffeisen bën humor me hallet e miletit”, ndërkohë që e shet këtë përpjekje si program përgjegjësie sociale.
Gazetari gjithashtu ka vënë në pikëpyetje ekzistencën e ndonjë programi serioz social nga ana e bankës, duke shtuar se aktivitetet e vetme publike janë disa pemë të mbjella te Liqeni i Tiranës, të cilat sipas tij janë përdorur për qëllime marketingu politik.
Më poshtë, deklarata e plotë e gazetarit Klodian Tomorri:
E vënë në qendër të skandaleve, për abuzime me kreditë siç janë rastet e fundit të bëra publike në media, Raiffeisen ka nxituar të shpërlajë imazhin e saj duke bërtitur publikisht se po mbështet familjet e reja me kredi të buta.
Po si i mbështet Raiffeisen familjet e reja me kredi të buta? A është duke hequr para nga fitimet e veta të majme? Përgjigja është: jo.
Ata që po mbështesin familjet e reja me kredi të buta janë takspaguesit shqiptarë, jo Raiffeisen. Paratë i paguan buxheti. Ndërsa Raiffeisen jo vetëm që nuk mbështet asnjë lek, por përkundrazi fiton para edhe nga kreditë e buta. Por Raiffeisen bën humor me hallet e miletit.
Për të vazhduar më tej, thonë që kemi shumë programe të përgjegjshmërisë sociale! Cfarë programesh të përgjegjshmërisë sociale ka Raiffeiseni?
Ka mbështetur me bursë ndonjë fëmijë nga shtresat në nevojë?
Ka financuar ndërtimin e ndonjë shkolle apo spitali? Jo.
Ka mbështetur ndonjë të moshuar pa njeri? Jo.
Thjesht kanë mbjellë ca pemë nga liqeni – dhe edhe aty janë përdorur politikisht.
Këto janë programet e përgjegjshmërisë sociale të Raiffeisenit. Por nejse.
Problemi më i madh me Raiffeisen – dhe një pjesë të bankave të huaja – është diku tjetër.
Ato po shndërrohen në frenues të rritjes ekonomike në Shqipëri.
Menaxherët e huaj që ato sjellin në Shqipëri nuk e kanë fare në prioritetet e tyre menaxhuese financimin e ekonomisë kombëtare. Por përkundrazi. Luajnë në fushën e tyre të sigurt dhe jetojnë jetën e bukur që u ofron Shqipëria.
Herë me të dashurat dhe herë me të dashurit e tyre, sipas rastit. Këto punët e festave lavish i bëjnë mirë Raiffeisen.
Ndërsa sa për përgjegjshmërinë sociale, janë këto barcaletat me kredi për shtresat në nevojë.
