Në vazhdën e zhvillimit të hetimeve për vrasjen e 30-vjeçares, Liridona Ademaj, Policia e Kosovës në koordinim me Prokurorinë dhe me urdhër të Gjykatës, ka kryer sot një aksion policor në fshatin Novosellë të Gjakovës, ku është arrestuar edhe i dyshuari i katërt, Tomë Dodaj.
Burimet e Gazetës Sinjali brenda Prokurorisë kanë bërë me dije se gjatë kontrollit të shtëpisë së Dodajt, Policia ka gjetur dhe sekuestruar një armë zjarri.
49-vjeçari është shoqëruar në stacion policor, ku është intervistuar nga organet e hetuesisë.
Lexo edhe:
Dodaj dyshohet se ka furnizuar me armën e krimit dy të dyshuarit tjerë, Naim Murselin dhe Granit Plavën.
Mbrëmjen e 29 nëntorit, i gjithë vendi u trondit nga ngjarja makabre ku viktimë ishte 30-vjeçarja, Liridona Ademaj.
Rasti fillimisht u cilësua ‘Grabitje e armatosur me pasojë vdekjen’, pasi të dyshuarit, Granit Plava, Kushtrim Kokalla dhe bashkëshorti i së ndjerës, Naim Murseli, dyshohet kishin inskenuar ngjarjen që të paraqitet si grabitje e armatosur.
Të dyshuarit ndodhen në paraburgim për 30 ditë në Burgun e Sigurisë së Lartë në Dyz.
