Teksa na ndajnë shumë pak ditë nga zgjedhjet e kësaj të diele, Partia Socialiste kuotohet si fituese në kryeqytete. Dje televizioni “Euronews Albania” na bashkëpunim me kompaninë “MRB” kanë sjellë sondazhin e radhës për qarqet e Tiranës dhe Durrësit. Sa i takon Tiranës janë zhvilluar 1015 intervista ballë për ballë në zonat urbane dhe rurale me persona me të drejtë vote (mbi 18 vjeç) nga 1 prilli deri më 15 prill. Partia Demokratike po gëzon rritje të mbështetjes së votuesve megjithatë rezultati i zgjedhjeve parlamentare për qarkun e Tiranës pritet të jetë me një avantazh të ndjeshëm të Partisë Socialiste. Sipas sondazhit, shumica e votuesve në qarkun e Tiranës priren të votojnë PS-në me një diferencë 4.3% më shumë se PD-në: PS – 42.2%; PD – 37.9%; LSI – 5.5%; Të tjerë – 1.8%; Nuk do të votoj – 3.2%; Nuk e di – 7.9%; Nuk përgjigjet – 1.5%; Krahasuar me dy sondazhet e shkuara, PS ka mbajtur pak-a-shumë të njëjtin nivel prej rreth 42% (42%; 41.5%; 42.2%), ndërsa koalicioni i PD-së “Aleanca për Ndryshim” ka gëzuar rritje të ndjeshme (31.7%; 36.5%; 37.9%). Ndryshe duket gjendja për LSI-në që ka pësuar tkurrje të mbështetjes nga 6.4 në 5.5%. Duke analizuar prirjen e votës dhe sjelljen e votuesve në krahasim me zgjedhjet e vitit 2017, kompania MRB parashikon që PS të fitojë qarkun e Tiranës me një diferencë 4.9%: PS – 48.3%; PD – 43.4%; LSI – 6.3%.
Me këtë përqindje për qarkun e Tiranës do të kishim këtë shpërndarje mandatesh: PS – 18 mandate; PD – 16 mandate; LSI – 2 mandate. Sondazhi për Qarkun e Tiranës tregon se 47.35% e të pyeturve kanë mendim pozitiv për kryeministrin Edi Rama. Kurse për liderin e opozitës, Lulzim Basha vlerësimi pozitiv është në nivelin 45.6%. Nga ana tjetër ka një vlerësim pozitiv prej 16% për Monika Kryemadhin. Opinioni pozitiv për liderët: Edi Rama 47.3%; Lulzim Basha 45.6%; Monika Kryemadhi 16%; Pas sondazhit të kaluar ku pati thuajse një barazim mes Edi Ramës dhe Lulzim Bashës, kryeministri ka krijuar sërish një diferencë të vogël.
Votat në Durrës
Lexo edhe:
Sondazhi i tretë në nivel qarku për Durrësin, i kompanisë MRB për “Euronews Albania”, tregon për një garë të fortë në zgjedhjet e 25 prillit ku diferenca mes partive kryesore do të jetë tejet e ngushtë. Prirja e votës sipas sondazhit pritet të jetë: PS – 40.4%; PD – 38.7%; LSI – 5.5%
Të tjera – 1.3%; Nuk do të votoj – 3.7%; Nuk e di – 8.5%; Refuzoj – 1.9%. Krahasuar me dy sondazhet e shkuara, PD ka gëzuar rritje të mbështetjes nga 36.9% në 38.7% ndërsa PS ka pësuar tkurrje nga 43.3% në 40.4% dhe tashmë diferenca ka shkuar nga 6.4% në 1.7%. Duke analizuar prirjen e votuesve dhe sjelljen e tyre me ato të zgjedhjeve të vitit 2017, kompania MRB parashikon që në qarkun e Durrësit mbështetja të ndahet në: PS – 47%; PD – 45%; LSI – 6.4%
Të tjera – 1.6%; Me këtë përqindje parashikimi për mandatet do të ishte thuajse në ekuilibër:
PS – 7 mandate; PD – 6 mandate; LSI – 1 mandat. Në Durrës, Lulzim Basha gëzon një pëlqyeshmëri më të lartë se sa Edi Rama, duke rikuperuar dhe përmbysur diferencën prej 7.3% nga sondazhi i parë për këtë qark. Të pyetur se për cilin lider kanë opinion pozitiv, 47.9% shprehin mendim të tillë për kryeministrin Rama. Ndërsa për liderin e opozitës Basha, janë 50.7% që kanë mendim pozitiv. Nga ana tjetër për kryetaren e Lëvizjes Socialiste për Integrim, Monika Kryemadhi mendim pozitiv kanë 23.8%.
Sondazhi në rang kombëtar
Sondazhi i pestë kombëtar i kompanisë MRB për Euronews Albania parashikon që Partia Socialiste t’i fitojë me një diferencë të ngushtë zgjedhjet e 25 prillit. Të pyetur se për cilën parti apo koalicion do të votonin, shumica u përgjigjën për PS-në, me një diferencë 6.2%: PS – 43%;
PD – 36.8%; LSI – 5.8%. Koalicioni i PD-së ka gëzuar rritje të konsiderueshme nga 28.2% në 36.8% teksa krejt ndryshe mbështetja për Lëvizjen Socialiste për Integrim është thuajse përgjysmuar nga 10.3% në 5.8%. Duke analizuar prirjen e votuesve dhe të të pavendosurve me ato të zgjedhjeve të vitit 2017, MRB parashikon që PS t’i fitojë zgjedhjet me një diferencë prej 7%: PS – 48.5%; PD – 41.5%; LSI – 6.5%.
