Presidenti i Republikës, Ilir Meta, ka folur sot për përplasjen që pati me policinë bashkiake në zyrat e FRD-së.
Ai tha se në letrën e lëshuar nga kryetari i Bashkisë, Erion Veliaj, nuk ka asnjë referencë ligjore për të nxjerrë partinë Fryma e Re Demokratike për të liruar zyrat.
Meta tha u përplas me efektivët pasi nuk po e linin të bënte detyrën pas thirrjes që i erdhi nga kryesia e FRD.
“Të gjitha veprimet e kryetarit të Bashkisë, kjo letër që nuk plotëson asnjë akt, i kërkoi FRD të lirojë zyrat si pronë e Bashkisë Tiranë, nuk kishte asjnë referencë ligjore.
Rezulton se FRD-së iu shkëput energjia elektrike, e më pas kanë shkuar policë në mbyllje të zyrës, ndërkohë që kryetari i saj ishte brenda.
Sulmi, një tentativë për të kërcënuar opozitën në tërësi.
Mbërrita në selinë e FRD, kontaktova me kryesuesit e kësaj partie, kur u drejtuam te hyrja, dera ishte e mbyllur nga policia bashkiake, sikur ishte skenë krimi. Fillimisht më hapën derën, ndërkohë që ende pa u futur mirë, policia në mënyrë të dhunshme tërhoqi me forcë stafin e Presidentit, prandaj reagova në atë mënyrë, sepse nuk po më linin të kryeja detyrën.
Del se FRD ka zaptuar zyrat publike, por kjo nuk është e vërtetë, se FRD ndodhet aty që në 2016, mbi bazën e një marrëveshje me bashkinë Tiranë, pra prej 5 vitesh. Kjo s’ndodh në vendin më të humbur afrikan, ku nuk ka shkrim e këndim” tha Meta.
