Gjatë verës shumë pushues zgjedhin të kalojnë ditët e relaksimit pranë detit, por bukuritë që fal natyra malore shqiptare janë mjaft tunduese. Alpet shqiptare janë të pa rezistueshme dhe të kalosh ditët e nxehta të verës në freskinë që buron mes gjelbërimit dhe ajrit të pastër është një mundësi shumë e mirë turizmi. Por ja cilat janë disa prej vendeve më të bukura malore të vendit tonë.
Thethi
Parku Kombëtar i Thethi gjendet në Alpet Shqiptare, pranë Bjeshkëve të Namuna, 70 km nga Shkodra. Një monument natyror vërtet interesant është ujëvara e Grunasit. Ujërat e saj zbresin nga një lartësi prej 30 metër, në zemrën e Alpeve Shqiptare. Thethi ka pamjen e një pellgu 800 metra mbi nivelin e detit. Ai është i vendosur midis një kurore majash të thepisura, si, Radohima, Maja e Arapit, Maja e Alisë, që spikatin për bukuritë e rralla në të gjithë Alpet. Thethi shquhet për kontrastet e relievit, ujëvarave, bimësisë së dendur, livadheve e sidomos ngjyrave.
Voskopojë
Voskopoja ndodhet shumë afër qytetit të Korçës, mbi një pllajë 1160 m mbi nivelin e detit. Karakteristikë e vendit është ajri i pastër dhe uji i freskët dhe kurativ. Natyra e qetë dhe është arsyeja kryesore që tërheq qindra shqiptarë për të kaluar pushimet.
Dardha
Dardha, është një fshat i thellë në zonën e Korçës, që në një ditë normale nuk ka më shumë se 40 banorë, por në ditë festash dhe pushimesh fshati mbushet nga vizitorët. Dardha është një fshat malor midis maleve e pyjeve, një bukuri e rrallë natyrore, në një lartësi 1 344 m. Dardha ofron një klimë shumë të shëndetshme e ajër të pastër.
Valbona
Lugina e Valbonës, pranë qytetit të Bajram Currit, është një destinacion shumë i vizituar. Shtrihet midis majash të larta e të thepisura të mbuluara me një kolorit fantastik ngjyrash në çdo stinë, duke dhënë kështu imazhin e një lugine plot labirinthe e të papritura dhe konsiderohet si mrekullia e Alpeve Shqiptare. Të bësh një udhëtim në dimër në luginën e Valbonës, është një mrekulli shpirtërore.
Razma
Razma, është një tjetër destinacion shumë i preferuar. Fshati i Razmës, rreth 40 km në veri të Shkodrës, është vendi ideal për të pushuar. Fshati të ofron mundësi akomodimi në hotele dhe bujtina. Ka një klimë tipike malore, ajër shumë të pastër e me vlera kurative.
