ROMË- Autoriteti Italian i Konkurrencës dhe Tregut (AGCM)(AGCM) ka vendosur një gjobë prej 7 milionë eurosh ndaj Philip Morris Italia, duke vlerësuar se disa mesazhe të përdorura në promovimin e produkteve me nikotinë mund të kenë krijuar një perceptim të gabuar te konsumatorët për rreziqet që lidhen me përdorimin e tyre.
Sipas vendimit të autoritetit, në komunikimin tregtar të kompanisë janë përdorur shprehje si “pa tym” dhe “e ardhme pa tym”, të cilat, sipas AGCM-së, mund të kenë lënë të kuptohet se produktet e duhanit të ngrohur IQOS, cigaret elektronike VEEV dhe qeskat me nikotinë ZYN janë të padëmshme ose paraqesin rreziqe shumë më të ulëta për shëndetin.
Lexo edhe:
Autoriteti italian thekson se, ndonëse këto produkte ndryshojnë nga cigaret tradicionale për mënyrën e konsumimit, ato nuk janë pa rrezik. Sipas AGCM-së, përdorimi i tyre shoqërohet me ekspozim ndaj substancave potencialisht të dëmshme dhe me varësinë nga nikotina, ndërsa nuk ekzistojnë prova përfundimtare që justifikojnë paraqitjen e tyre si produkte të sigurta për shëndetin.
Vendimi nënvizon gjithashtu se fushatat promovuese janë zhvilluar në kanale të ndryshme komunikimi, duke arritur një audiencë të gjerë. Për autoritetin, kjo e bën edhe më të rëndësishme që informacioni i ofruar konsumatorëve të jetë i qartë, i plotë dhe të mos minimizojë rreziqet që lidhen me përdorimin e produkteve me nikotinë.
Në të njëjtin kontekst, është ngritur edhe çështja e bashkëpunimeve mes Philip Morris dhe disa organizatave të konsumatorëve në Itali. Sipas raportimeve, autoriteti ka analizuar edhe ndikimin që mund të kenë pasur këto iniciativa në perceptimin e publikut, në kuadër të hetimit administrativ.
Vendimi i AGCM-së është administrativ dhe mund të ankimohet nga kompania në gjykatat kompetente italiane, sipas procedurave të parashikuara nga ligji.
Rasti pritet të ushqejë më tej debatin mbi mënyrën se si promovohen produktet alternative të duhanit dhe nikotinës, si dhe mbi nivelin e informacionit që duhet t’u ofrohet konsumatorëve për rreziqet e mundshme që lidhen me përdorimin e tyre.
Edhe në Shqipëri, çështja e reklamimit të produkteve të duhanit të ngrohur ka ngjallur debat.
Megjithëse legjislacioni shqiptar parashikon ndalimin e reklamimit dhe promovimit të produkteve të duhanit në media, televizion, radio, shtyp dhe shërbime të shoqërisë së informacionit, në praktikë produktet si IQOS janë shfaqur në forma të ndryshme promovimi dhe në përmbajtje mediatike, duke ngritur pikëpyetje mbi zbatimin e ligjit dhe mbikëqyrjen nga autoritetet përgjegjëse.
Ekspertët e kontrollit të duhanit kanë theksuar prej vitesh se Shqipëria ka një kuadër ligjor kufizues për reklamimin e produkteve të duhanit, por sfida mbetet zbatimi efektiv i tij
