Nëse do të portretizonim një grua, një bijë, një nënë të Shkodrës duke i shtuar asaj edhe profilin politik, sigurisht që do të duheshin radhë të gjata. Kjo sidomos kur bëhet fjalë për zonjën Majlinda Angoni.
Me një angazhim të spikatur në fushën për të drejtat dhe liritë themelore të grave dhe pas një përvoje 1-vjeçare si Prefekte e Qarkut të Shkodrës, Majlinda Angoni vjen si një kandidate potenciale për të marrë drejtimin e bashkisë më të madhe në veri të vendit.
Konfirmimi i emrit të saj në krye të listës së Partisë Socialiste në garën për të drejtuar Bashkinë e Shkodrës, merr një kuptim të veçantëshmë, pasi kjo bashki prej më se tre dekadash është konfirmuar një bastion i fuqishëm i së djathtës shqiptare. Megjithatë Majlinda Angoni lindur, rritur dhe jetuar në Shkodër po kërkon mbështetjen e bashkëqytetarëve të saj.
Angazhimi i saj është dominues veçmas në lëmin e biznesit dhe përfshirjen maksimale në shoqërinë civile, fushë që më pas do të shfaqej me interes në realizimin e objektivave të saj në formësimin dhe zbatimin e politikave publike në vend.
Për këtë arsye një prej premtimeve të saj elektorale në garën për të fituar Bashkinë e Shkodrës në zgjedhjet e datës 6 mars 2022, është mbështetja e biznesit me politika fiskale lehtësuese dhe forcimin e rolit të gruas sidomos në zonat problematike dhe të izoluara sociologjikisht ndër vite në rajonin tonë.
Zonja Angoni dhe ekipi i saj, i cili përbëhet prej personalitetesh të kualifikuar dhe me një përvojë të gjatë menaxheriale, kërkojnë që të sjellin një frymë të re në drejtimin e njërës prej bashkive nga më të mëdhatë dhe më problematike në vend, siç është ajo e Shkodrës.
Problematikat e pazgjidhura në gjithë këto vite nga ish-kryetarët e kësaj bashkie janë të shumta, por zonja Angoni ka disa ide të qarta. Ajo vjen në këtë garë me një platformë të veçantë dhe që do të vihet në zbatim sapo të marrë postin e Kryetares së bashkisë së Shkodrës.
Për zonjën Angoni prioritet për qytetin e Shkodrës mbetet Menaxhimi i Mbetjeve Urbane, Impianti i Ujrave të Zeza apo edhe Transporti Urban. Këto janë tri problematika me të cilat shkodranët po përballen prej vitesh.
Më tej rritja e cilësisë së jetesës për qytetarët shkodranë është ashti i programit të zonjës Angoni për Shkodrën.
Problematika e fermerëve të cilët prej shumë vitesh përballen me fenomenin e përmbytjeve, është një tjetër pikë në programin e zonjës Angoni. Ajo vjen me projekte konkrete pas nohjes së situatës në postin e Prefektes gjatë përmbytjeve të dimrit që lamë pas.
Përveç rolit në politikë zonja Majlinda Angoni është një nga iniciatoret e lëvizjeve të para të gruas në Shqipëri dhe Kosovë. Gjatë viteve 1999-2006 ajo ka qënë themeluese dhe drejtuese e dy Qendrave të Këshillimit në Prizren dhe Pejë, si dhe në vitin 2002 ajo do të themelonte organizatën “Gruaja tek Gruaja”,me qendër në Shkodër duke luajtur një rol të rëndësishëm në fushën e mbrojtjes së të drejtave të njeriut, fokusuar tek të drejtat e grave dhe të vajzave.
Tek Majlinda Angoni bashkëqytetarët e saj më shumë shikojnë dimensioni njerëzor dhe profesional, aftësitë e saj menaxheriale sesa i një gruaje që hyn në politikë për karierë.
Zgjedhjet e 6 marsit për garën e Bashkisë së Shkodrës zhvillohen në kohën kur është vënë re një çarje e madhe e opozitës së djathtë, apo edhe paragjykimi që kanë shkodranët ndaj opozitës së majtë LSI. Këto zhvillime duket se e favorizojnë Majlinda Angonin një kandidatë potenciale për ta marrë Bashkinë e Shkodrës, një fakt që për Partinë Socialiste do të konsiderohej si një fitore e madhe në veri të vendit, të paktën që prej krijimit të saj.
