Elhaida Dani publikoi pak ditë më parë albumin e ri të titulluar “ZanIN”, por ndjekësit në rrjete sociale e kanë akuzuar këngëtaren se ka kopjuar Elvana Gjatën.
Para pak muajsh, Elvana publikoi albumin e saj “Çelu”, i cili përfshinte vtëm këngë në gjuhën shqipe, shoqëruar me videoklipet përkatëse. Pas akuzave që i janë bërë online, Dani reagoi për herë të parë dje gjatë intervistës për “T7”.
Artistja, e cila është zhvendosur në Itali prej nëntë vitesh, mohoi ta ketë kopjuar Gjatën.
Lexo edhe:
“Nuk është e vërtetë, por të them të drejtën që Elvana ka qenë e para që risolli muzikën shqiptare në këtë lloj stili, në këtë lloj mënyre sa më moderne dhe e kam vlerësuar shumë, sepse duhej ta bënte dikush. Elvana e bëri aq mirë sa e riktheu në modë le të themi dhe i la hapësirë çdo artisti tjetër për ta bërë”,- tha Elhaida.
Albumi i Danit përfshin pesë këngë: “Zanin”, “Jam betu”, “Kënga jonë”, “Amore”, “Hajmali”, të cilat janë shoqëruar po ashtu me videoklipe.
E pyetur për jetën private, Elhaida tha se është “shumë e lumtur”, por nuk preferoi të zbulonte më shumë.
“Jam me fat, sepse rrethohem nga njerëz që më bëjnë të lumtur. Tani gjeje vetë pse, kush, çfarë…”,- u shpreh artistja.
