Kanë kaluar 4 ditë nga ky kaos që ka zaptuar qytetin dhe ka qënë e vështirë të gjesh fjalët e të mbash një qëndrim. Është e vështirë të shikosh e dëgjosh një baba që shpresonte ti bënte dasmën të birit e në vend të saj, hap dyert e mortit.
E është po aq e vështirë të shohësh në rrugë të rinjtë që dje akuzoheshin si “kafexhinjtë e bllokut” sepse nuk ngriheshin për të drejtat e tyre, tek quhen sot halabakë e huliganë sepse “u kujtuan” të kërkojnë shtetin e së drejtës.
Të rinj që kërkojnë vetëm ndëshkueshmëri ligjore ashtu si kushtetua e kërkon. Të rinj që kërkojnë që ai krimineli, që policia demek e ka shpallur në kërkim, të mos ulet në tavolinën ngjitur me ta të restorantit përballë gjykatës së krimeve të rënda. Të rinj që bashkë me trafikantët “e rëndomtë” të drogërave, të ndëshkohen njësoj edhe ata të mëdhenjtë që ju shesin kokainën atyre e bijve të tyre. Të rinj që kërkojnë të mos përbuzen nga pjella e hajdutëve e kriminelëve të cilët u pasuruan në kurriz të prindërve të tyre që derdhën gjak që fëmijët e tyre të mos përfundojnë rrugëve nga frika se policia po jua vret.
Por prej 4 ditësh këta “halabakë” lihen të vetëm ndërkohë që “elita” e shoqërisë shqiptare hesht. Çfarë i druhen? Çfarë kanë për të fshehur? Për sa u shitën? Në mos miell, çfarë paska patur thesi i tyre? Kur interesat tu prishen e të kujtohen të protestojnë, a do e kërkojnë popullin vallë?
Ku janë mësuesit që janë bërë si dekorimet që vihen mbi komedinë nga qejfi i njërës palë e flaken tutje nga qejfi i palës tjetër? Ku janë pronarët e bizneseve që deklarojnë vetëm minimalen e rrogave e pjesën tjetër të pagave jua japin punonjësve lekë në dorë se duan të shmangin taksat e larta? Ku janë bizneset që bojkotohen nëpër tendera sepse konkurrenti që ofron shifrën më të lartë fiton se kështu i duhet shtetit për llogaritë e interesave të vet? Ku janë mediat të cilat janë bërë kukullat e në mos njërës qeveri, të tjetrës kur të vijë?
KU JENI JU FORT TË NDERUAR???
A nuk ju duket dhuna e këtyre huliganëve forma e duhur e protestës? Prijuni para ju!
Ofrohuni ju për tu vënë në krye të shtetit që ti ndihmoni këta të rinj të mos bëhen vegël as e qeverisë, as e partive opozitare. Nihmojini ju këta të rinj e të përzejnë ata në dorët e të cilëve nuk keni qënë veçse zara që jeni hedhur e bredhur sipas lojrave të tyre.
Vetëm ju lutem mos u bëni qesharakë. Mos u thoni që kjo protestë na qenka politike se nuk tregoni tjetër veçse injorancë dhe neveri.
Patjetër që është politike. Çfarë u quaka, sipash jush, të kërkosh një shtet ligjor? Çfarë u quaka, sipas jush, të kërkosh siguri në tokën tënde? Çfarë na ditkeni ju politikë, që bota e historia e paska njohur gabim?
Në paçi dashuri për vendin tuaj, në paçi Zot, dhembsuri e gjak, mos qani për pemën e për paqen e maskuar. Në qofshi kaq të varfër, ndryshe nga ju, nuk do t’ju përbuzim, por as do t’na dhimbseni.
