Sekretari i Përgjithshëm i Partisë Socialiste Damian Gjiknuri është i bindur Partia Socialiste do të marrë 5 nga 6 bashkitë ku do të ketë zgjedhje më 6 Mars. I ftuar në studion e emisionit Publikisht në RTSH këtë të premte ai deklaroi se 5 bashki nuk i vë në diskutim ndërkohë që kanë shanse të mira edhe për Shkodrën, theksoi ai, duke pasur parasysh çarjen e opozitës.
“5 bashki nuk i vë në diskutim. Shkodra ka një garë më të fortë. Por edhe aty do të kemi një rezultat më të mirë duke pasur parasysh edhe çarjen e opozitës. Gjasat janë nga pikëpamaja e probabilitetit elektoral.
Ekziston mundësia që Shkodra të merret kësaj radhe. PS nuk është investuar aq fort në këtë fushatë. Fushata ka qenë e ngarkuar te drejtuesit politikë sipas qarqeve. Në Tiranë ka qenë zoti Erion Veliaj. Në Shkodër drejtuesit politikë të qarkut Shkodrës. Këto zgjedhje janë konsideruar zgjedhje lokale administrative dhe u takon qytetarëve të atyre zonave”, u shpreh Gjiknuri.
Lexo edhe:
Ai e cilësoi këtë datë zgjedhjesh të dekretuara nga presidenti Ilir Meta një lojë politike të këtij të fundit kundër Lulzim Bashës duke theksuar se gara në këtë proces elektoral është se kush do të dalë i dyti ndërmjet Bashës dhe Berishës.
“Kjo ishte më shumë një lojë politike mes Metës dhe Berishës për të futur Partinë Demokratike më shumë në krizë. U pa si lëvizja e radhës politike e presidentit kundër Lulzim Bashës. Gara është se kush do dalë i dyti në këtë garë”, tha ai.
Ndalur në këtë çështje, Gjiknuri deklaroi se presidenti nxitoi t’i dekretonte zgjedhjet duke parë zhvillimet në Partinë Demokratike ndërkohë që duhet t’i dekretonte 48 orë nga shpallja e vakancës.
‘Presidenti duhet t’i shpallte zgjedhjet. Vendimi i Gjykatës Kushtetuese kishte kohë që ishte marrë. Presidenti nxitoi t’i dekretonte zgjedhjet duke parë zhvillimet në Partinë Demokratike. Ai ka qenë në pritje të Gjykatës Kushtueses por zgjedhjet duhet t’i dekretonte 48 orë nga shpallja e vakancës. Ligji e ka shumë të qartë. Këshilli i Ministrave ka njoftuar për të gjitha vakancat. Pse u kujtua presidenti të Pse u kujtua presidenti të çojë shkresa pas zhvillimeve të Janarit në selinë blu. Ligjërisht presidenti ka pasur detyrimin t’i bënte zgjedhjet me kohë. Nëse do tregohej aq korrekt me ligjin duhet të bënte menjëherëë pas daljes së vendimit”, deklaroi Gjiknuri.
Gjiknuri foli edhe për akuzat për shitblerje votës duke iu referuar një telefonate për të cilën akuzohet një kandidat socialist. Ai tha se telefonatat shpesh herë nxirren nga konteksti duke iu referuar edhe rastit të tij kur disa vite më parë u shfaq në përgjime duke përdorur një frazë “Tërmet” sa i takon zgjedhjeve të atij viti. Ai tha se një metaforë e përdorur prej tij asokohe u kthye në krim elektoral.
“Nuk i besoj shumë këtyre telefonatave. Unë kam qenë vetë viktimë e këtyre telefonatave ku një metaforë qës përdora u kthye në krim elektoral. Publiku pret më shumë nga kjo garë për të parë se kush e shumicën brenda Partisë Demokratike. Ka qenë një taktikë e presidentit për të futur grupin e Lulzim Bashës në krizë. Dhe duket se ia ka arritur. Unë si sekretar i përgjithshëm i PS do doja që PS në pjesën më të madhe te bashkive që garojmë të fitojë më shumë se ata të dy bashkë”, tha Gjiknuri.
