Kryetari i Bashkisë së Tiranës, Erion Veliaj i cili prej 10 shkurtit ndodhet i burgosur në ambientet e paraburgimit në Durrës dhe ish-presidenti i vendit, Ilir Meta, i cili prej tetorit është i izoluar në burgun 313, kanë paraqitur ankesat e tyre tek komisionerët e Avokatit të Popullit.
Veliaj nga njëra anë ka pretenduar se shoqërimi i tij në spital ka qenë jo proporcional dhe diskriminues si dhe ka ngritur shqetësime mbi mënyrën se si po trajtohet në qeli.
Përmes një postimi të bërë disa ditë më parë, vetë politikani i lartë socialist, akuzoi direkt agjentët e Byrosë Kombëtare të Hetimit për “ngacmim seksual”, sepse janë futur në sallën e operacionit, kur ai ju nënshtruar ndërhyrjes kirurgjikale.
Erion Veliaj përdori termin francez “voyerism”, i cili përfshin sipas shpjegimit zyrtar “ngacmimin seksual duke parë një person të pavëmendshëm i cili është i zhveshur, lakuriq ose i angazhuar në aktivitet seksual.” Në sallën e operacionit, Erion Veliaj ashtu si të gjithë pacientët, ka qenë pa rroba.
Ndërkohë, nga ana tjetër ish-presidenti i vendit, Ilir Meta është ankuar pasi nuk e bën dot ajrimin njësoj si të burgosurit e tjerë, kjo për shkak të masave të shtuara. Gjithashtu, ai ka shprehur shqetësimin edhe sa i përket aktiviteteve fizike të cilat i janë kufizuar.
Sakaq, burime për Anila Hoxhën bëjnë me dije se këto ankesa të dy politikanëve shqiptarë janë duke u administruar, dhe se dy komisionerët kundër torturës do t’i kërkojnë institucioneve përkatëse se cili ka qenë plani i masave ditën që Veliaj u shoqërua në spital dhe cili është plani i masave pranë 313-ës.
