Hyrja e papritur e banorit më të ri në shtëpinë e “Big Brother VIP Albania 5” ka trazuar ujërat jo vetëm brenda shtëpisë, por edhe jashtë saj.
Ndërsa publiku po njihet me natyrën e tij karizmatike dhe dinamikat e reja që premton të sjellë në lojë, një hulumtim në të shkuarën e tij zbulon një histori krejt tjetër, të fshirë nga dritat e prozhektorëve, por të gdhendur në arkivat e policisë italiane.
Burime dhe dokumente të zbardhura nga mediat italiane konfirmojnë se Florjan Prini nuk është një emër i panjohur për drejtësinë përtej Adriatikut.
Rreth një dekadë më parë, emri i tij është lakuar në kronikat e zeza të Riminit, si pjesë e një operacioni policor që tronditi zonën e Torre Pedrera-s.
Çfarë fshihet në dosjen e vitit 2014?
Sipas raporteve të asaj kohe, Florjan Prini u arrestua nga autoritetet italiane nën akuzën e rëndë të shfrytëzimit dhe favorizimit të prostitucionit.
Hetimet e policisë së Riminit zbuluan se ai, në bashkëpunim me një partnere (e identifikuar asokohe si Fabjana Hoxha), kishte ngritur një skemë të mirëfilltë zhvatjeje ndaj vajzave që punonin në rrugët e bregdetit italian.
Detajet e dosjes janë tronditëse: Prini akuzohej se u impononte vajzave një “taksë” ditore (qira trotuari) prej rreth 50 eurosh.
Refuzimi për të paguar këtë shumë sillte pasoja të rënda, përfshirë dhunën fizike dhe kërcënimet, elementë këto që çuan në denoncimin e rastit dhe finalizimin e operacionit policor.
