Një tjetër viktimë mes mësuesve është shënuar ditën e sotme nga Covid-19. Ai është Ylli Xhaferri, ish-mësues Letërsie dhe ish-Drejtor i Gjimnazit të Rrogozhinës, “Haxhi Qehaj”.
Mësohet se ai ka humbur jetën pas infektimit nga Covid-19, në Spitalin Infektiv në kryeqytet, ndërsa lajmin e hidhur e ka bërë me dije vetë stafi i kësaj shkolle, të cilët kanë përcjellë mesazhe ngushëllimi në rrjetet sociale.
Mesazhi i ndjerë i stafit të shkollës “Haxhi Qehaj” në Rrogozhinë:
Ylli Xhaferri ishte për ne kolegu, intelektuali, drejtuesi, poeti, prozatori, qytetari dhe miku që me altruizmin e tij ishte i kudogjendur! Ai ishte njeriu që karakterizohej nga pasioni për letërsinë, artin, arkitekturën dhe historikun e qytetit tonë!
Një njeri me humor dhe pozitivitet, i gatshëm të ndihmonte çdo mësues të ri që të ndihej plot vetëbesim dhe pjesë e rëndësishme e institucionit. Largimi i tij i parakohshëm ishte një humbje për miqtë dhe të njohurit! Të qoftë dheu i lehtë poet! Ngushëllimet më të sinqerta familjes, kolegëve dhe të afërmve të tij!”.
