Sipas raportimeve në media, çështja ndodhet aktualisht në fazën e seancës paraprake në Gjykatën e Tiranës, ndërsa seanca e radhës është planifikuar më 22 shtator 2026.
Sipas të dhënave të bëra publike, Gremi dhe shoqëria “Gremi Wellness” dyshohet se kanë futur në Shqipëri produkte “Botox” me princip aktiv “Botulinum toxin”, të cilat nuk ishin të pajisura me autorizim për tregtim në vend.
Në kuadër të hetimit janë marrë në shqyrtim edhe pajisje mjekësore të pacertifikuara, të cilat janë konstatuar gjatë kontrollit në ambientet e “Gremi Clinic”.
Hetimi për këtë çështje lidhet me operacionin “Botulinum Toxin”, të zhvilluar nga autoritetet në tetor të vitit 2024. Në atë kohë, autoritetet kryen kontrolle në rreth 30 klinika estetike dhe parukeri në Tiranë, pas dyshimeve se në këto ambiente përdorej botoks i paregjistruar dhe i paautorizuar për tregtim në Shqipëri.
Gjatë kontrolleve u sekuestruan produkte me toksinë botulinike, ndërsa hetimi u fokusua te mënyra e furnizimit dhe shpërndarjes së tyre në klinika estetike.
Në kuadër të operacionit u shpallën në kërkim tre persona, mes tyre edhe mjeku Skerdi Faria, ndërsa raportohet se për këtë të fundit është pushuar çështja.
Faria, administrator i klinikës “Keit”, u shpall në kërkim nën dyshimet se ishte i përfshirë në aktivitetin e lidhur me përdorimin e botoksit të paregjistruar. Në atë kohë nuk dihej nëse ai ndodhej në Shqipëri apo jashtë vendit, ndërsa mjeku nuk kishte bërë një reagim publik lidhur me shpalljen e tij në kërkim.
Pas gati dy vitesh nga operacioni, i pandehur për rastin është marrë Gremi dhe shoqëria“Gremi Wellness”, ndërsa Skerdi Faries i është pushuar çështja. Kështu, mjeku që në tetor 2024 ishte shpallur në kërkim në kuadër të dosjes, tashmë nuk do të përballet me akuzat duke i shpëtuar drejtësisë.
