Parlamenti Evropian miratoi me 462 vota pro një amendament në raportin për Shqipërinë, ku shpreh shqetësim për investimet e planifikuara në Zvërnec dhe Sazan, si edhe për ndryshimet ligjore që prekin zonat e mbrojtura, përfshirë Vjosë-Nartën.
Një amendament i dytë i kushtohet protestave që po zhvillohen kundër projektit, duke theksuar se Komisioni Evropian ka paralajmëruar autoritetet shqiptare për veprime që mund të ndikojnë në rrugën e vendit drejt anëtarësimit në Bashkimin Evropian. Eurodeputetët rikujtojnë se respektimi i legjislacionit evropian për mbrojtjen e shpendëve dhe habitateve natyrore mbetet një kusht themelor për integrimin evropian të Shqipërisë.
Votimi erdhi një ditë pasi Komisionerja për Zgjerimin, Marta Kos, deklaroi se Komisioni Evropian ka marrë garanci nga qeveria shqiptare se projekti do t’i nënshtrohet një vlerësimi të plotë të ndikimit në mjedis dhe se do të respektohen standardet evropiane. Nga ana tjetër, kryeministri Edi Rama u shpreh se institucionet evropiane janë njohur me të gjithë procedurën administrative që lidhet me projektet në Sazan dhe Zvërnec.
