Rasti i kartave të klonuara në ATM nxori në pah jo vetëm një problem serioz sigurie, por edhe një problem edhe më të madh: mungesën e transparencës nga Banka Kombëtare Tregtare. Qytetarët nuk u informuan nga institucioni që u mban paratë, por nga media. Vetëm pasi skandali u publikua nga “Kapitali”, BKT doli me një reagim zyrtar.
Kjo mënyrë komunikimi është e papranueshme për një bankë që pretendon standarde europiane dhe që administron fondet e qindra mijëra klientëve. Kur ndodh një thyerje sigurie që prek drejtpërdrejt xhepin dhe besimin e qytetarëve, institucioni nuk ka luksin të heshtë dhe të presë derisa dikush tjetër ta zbulojë. Informimi duhet të jetë i menjëhershëm, i plotë dhe transparent.
Reagimi i vonuar i BKT-së ngre dyshime të ligjshme: nëse media nuk do ta kishte zbuluar rastin, a do të ishin informuar ndonjëherë klientët? A do të ishte pranuar publikisht se kartat janë klonuar në një ATM në Tiranë? Heshtja fillestare nuk i shërben as sigurisë së klientëve, as besimit publik, por vetëm mbrojtjes së imazhit të institucionit.
Lexo edhe:
Edhe pse banka premton rimbursim për qytetarët e dëmtuar, kjo nuk e justifikon mungesën e njoftimit paraprak. Në një sistem bankar modern, transparenca nuk është favor, por detyrim. Qytetarët kanë të drejtë të dinë menjëherë kur ekziston një rrezik për llogaritë e tyre, në mënyrë që të marrin masa dhe të mbrohen.
Ky rast duhet të shërbejë si kambanë alarmi jo vetëm për BKT-në, por për gjithë sektorin bankar: siguria dhe komunikimi i ndershëm me publikun nuk janë çështje imazhi, por themel i besimit. Bankat nuk duhet të flasin vetëm kur media i detyron, por kur qytetarët kanë nevojë të informohen.
/Vip Magazine/
