Deputeti Erion Braçe ka reaguar ashpër ndaj përhapjes masive të duhanit elektronik dhe produkteve IQOS te fëmijët dhe të miturit, duke e cilësuar situatën si krim të hapur ndaj shëndetit publik dhe një dështim flagrant të shtetit dhe prindërve.
Në një reagim publik me tone të forta, Braçe ngre alarmin për faktin se fëmijët mbajnë duhanin elektronik në duar gjatë gjithë ditës, duke e thithur “si robotë, në një ritual varësie”, ndërkohë që produktet shiten lirshëm edhe për të miturit, pa asnjë pengesë ligjore në praktikë.
Braçe ndalet edhe te paralajmërimet e shkruara në paketim, duke ngritur pyetje tronditëse:
“Mos e gëlltisni dhe mos e çmontoni. Ky produkt përmban një pjesë të mprehtë”.
Lexo edhe:
“Çfarë është kjo pjesë e mprehtë? Për çfarë duhet në një cigare?”, pyet ai, duke theksuar se edhe pa u çmontuar, produkti paraqet rrezik serioz për fëmijët.
Sipas tij, skandali thellohet edhe më shumë nga fakti se në dyqane, kioska dhe pika shitjeje në Tiranë dhe qytete të tjera, mungon çdo tabelë që ndalon qartë shitjen për fëmijë, ndërsa shitësit ua ofrojnë produktin kujtdo, pa dallim moshe.
Braçe akuzon drejtpërdrejt kompaninë prodhuese, duke e quajtur sjelljen e saj kriminale, dhe kërkon ndërhyrje të menjëhershme të shtetit:
“Kjo që po ndodh është shkelje ligji. Tani shteti duhet të bëjë detyrën. Prindërit, ndërkohë, kanë dështuar.”
Reagimi i tij ka hapur një debat të fortë publik mbi rolin e Philip Morris, mungesën e kontrollit shtetëror dhe dështimin për të mbrojtur fëmijët nga një produkt që po përhapet masivisht mes të miturve.
Reagimi i deputetit vjen në një kohë kur përdorimi i duhanit elektronik te të miturit po rritet ndjeshëm, ndërsa mungesa e kontrolleve dhe zbatimit të ligjit po kthen një problem shëndetësor në një krizë kombëtare.
