Në Komunën e Çairit u zhvillua sot një ditë përkujtimore në nderim të artistit të njohur Shpat Kasapi, i cili u nda papritur nga jeta disa ditë më parë. Familjarë, miq, kolegë dhe artdashës u mblodhën për të nderuar kujtimin dhe veprën e tij.
Mes të pranishmëve, një nga fjalimet më prekëse ishte ai i nënës së Shpatit. E mbuluar nga dhimbja, ajo u shpreh se, pavarësisht se kishte ligjëruar për 22 vite, sot nuk gjente dot forcën të fliste. “Është një emocion që nuk e kam ndjerë kurrë dhe e ndjejnë të gjitha nënat që humbasin një fëmijë. Jam krenare që kam lindur një djalë që e keni dashur kaq shumë. Le të pushojë i qetë, sepse vitin e fundit nuk ka qenë,” tha ajo mes lotësh.
Më pas, fjalën e mbajti bashkëshortja e tij, Selvije Jao, e cila foli me shumë emocion për njeriun që e quajti “njeriun që e kompletoi”. Ajo u shpreh se Shpati e kishte dashur, respektuar dhe mbështetur pa kushte, ndërsa rrëfeu edhe sfidën më të madhe që e pret: t’i shpjegojë djalit të tyre, Roelit, humbjen e babait.
“Roeli është vetëm tre vjet e gjysmë dhe ende nuk e kupton se babai nuk është më. Nuk e di kush do t’i tregojë, por e di që ai do të jetë krenar për të. Shpati ishte përkushtuar deri në frymën e fundit që djali të kishte gjithçka. I kam thënë gjithmonë: ti je shumë i mirë për këtë botë mizore,” u shpreh ajo.
Shpat Kasapi u përcoll për në banesën e fundit të dielën e kaluar, në Tetovë, duke lënë pas një boshllëk të thellë tek familja, miqtë dhe admiruesit e tij.
