Shkrimtari dhe publicisti i njohur Ben Blushi ka ndarë me lexuesit e tij një rrëfim të shkurtër, por shumë domethënës, për romanin e tij më të ri, i cili pritet të dalë në treg në fillim të muajit nëntor.
Në postimin e tij, Blushi ka përshkruar reagimet që mori nga shkrimtarë dhe botues pas leximit të dorëshkrimit, duke lënë të kuptohet se bëhet fjalë për një vepër që pritet të shkaktojë debat në letërsinë shqipe.
Më poshtë, teksti i plotë i Ben Blushit:
Lexo edhe:
Një histori e shkurtër e romanit tim të ri
Isha në shtypshkronjë për të korrektuar variantin përfundimtar të romanit tim të ri që del në fillim të muajit nëntor.
Është herët për të treguar më shumë për përmbajtjen, por për të qetësuar dyshimet e mia ia dhashë dorëshkrimin dy shkrimtarëve dhe tre botuesve.
Shkrimtari i parë tha se ky roman e ndan letërsinë shqipe në dy pjesë: para dhe pas tij.
Shkrimtari i dytë tha duhet ta botosh patjetër dhe me çdo sakrificë.
Botuesja e parë më tha nuk e botoj dot sepse nuk më lë ai lart.
Në fillim mendova se ai lart ishte Zoti, por më vonë mora vesh se ishte burri i saj.
Botuesja e dytë e lexoi deri në mes dhe u tmerrua aq shumë sa nuk lexoi dot gjysmën tjetër.
Botuesi i tretë më tha nuk kam frikë. Jam ateist.
Zgjodha të tretin.
Nuk e di a do më duhet një i katërt.
Ky rrëfim, me stilin ironik dhe sarkastik që e karakterizon Blushin, ka ngjallur menjëherë interes dhe diskutime në rrjetet sociale. Disa e quajnë një paralajmërim për një roman që do të trazojë kufijtë e letërsisë bashkëkohore shqiptare, ndërsa të tjerë e lexojnë si një koment të hollë mbi realitetin e botimeve dhe frikërat që rrethojnë fjalën e lirë.
Ben Blushi, i njohur për romanet “Të jetosh në ishull”, “Otello, Arapi i Vlorës”, “Vilma”, “Kandidati” e të tjerë, nuk ka zbuluar ende titullin apo tematikën e romanit të ri, por sipas tij, vepra tashmë është gati për botim.
Romani pritet të publikohet në fillim të nëntorit dhe, siç lë të kuptohet autori, mund të jetë një nga ngjarjet më të komentuara të vitit në letërsinë shqipe.
