Vjena është zgjedhur për të pritur konkursin e këngës Eurovision 2026, ngjarjen më të madhe muzikore të transmetuar drejtpërdrejt në botë, njoftoi transmetuesi publik i Austrisë, me finalen e caktuar për 16 maj.
JJ i Austrisë fitoi konkursin e këtij viti, të mbajtur në Bazel të Zvicrës, me këngën e tij Wasted Love, e cila përzien ritmet tekno me vokale operistike, duke e bërë vendin e tij pritës të vitit 2026.
Finalja e edicionit të 70-të të Eurovision do të mbahet në Wiener Stadthalle, arenën më të madhe të mbyllur të Austrisë, me gjysmëfinale të caktuara për 12 dhe 14 maj, tha Eurovision.
Që nga lançimi i tij në vitin 1955, Eurovision është bërë platformë e madhe e muzikës pop, duke e katapultuar grupin suedez Abba drejt famës botërore, si dhe duke i dhënë jehonë artistëve si Céline Dion, Cliff Richard dhe Olivia Newton-John.
Rreth 166 milionë shikues në 37 vende e ndoqën konkursin e këtij viti, me një rekord prej 60% të shikuesve të moshës 15 deri në 24 vjeç. Konkursi mori edhe më shumë shikime në Instagram dhe TikTok.
