Kombëtarja e realizoi objektin e saj për të qenë në finalet e Europianit. Ishte një moment magjik për ekipin tonë dhe trajnerin Silvinjo, të cilët jo vetëm mundësuan kualifikimin direkt nga grupi E, por ia dolën për herë të parë në një fazë eliminatore të zënë vendin e parë në grup, diçka që nuk kishte ndodhur më parë. Pra Shqipëria shkoi në Europian si kokë grupi dhe përfitoi falë pozicionit edhe një renditje më të mirë në vazot e shortit. Tani mbetet të hidhen goglat e të mësohen rivalët në grup, për të shpresuar një ecuri me kalim raundi në Europianin e “Gjermanisë”. Tashmë UEFA është vënë në lëvizje dhe nëpërmjet një njoftimi sqaron tifozët e Shqipërisë se si duhet të aplikojnë për të parë ndeshjet e përfaqësueses së tyre në fazën e raundit të parë.
Njoftimi nga UEFA
UEFA njofton të gjithë tifozët e Kombëtares shqiptare në mbarë botën se së shpejti nis procesi i shitjes së biletave të ndeshjeve të Kampionatit Europian “Gjermani 2024”. Të gjithë të interesuarit për t’u pajisur me bileta për ndeshjet e vitit të ardhshëm në Gjermani, mund të hyjnë në faqen zyrtare të UEFA.com, duke përdorur linkun https://ëëë.uefa.com/euro2024/ticketing/. Federata Shqiptare e Futbollit nënvizon se nuk shet asnjë biletë për tifozët e Kombëtares, por biletat për ndeshjet e Kombëtares apo ndeshjet e tjera të finaleve të Europianit do të shiten vetëm online në faqen e UEFA-s, në linkun e lartpërmendur. Tifozëve u kërkohet që të krijojnë një llogari në faqen zyrtare të UEFA-s dhe të aplikojnë për bileta për ndeshjet e preferuara të Kombëtares shqiptare. Regjistrimi nis në datën 4 deri më 12 dhjetor 2023, pasi Kombëtarja shqiptare të njohë kundërshtarët në grup dhe stadiumet ku do të luajë. “Në momentin që regjistroheni, ju duhet të identifikoheni si tifoz i Kombëtares shqiptare, duke zgjedhur ndeshjet e Shqipërisë (flamur shqiptar). Gjithashtu, ju duhet të përcaktoni edhe numrin e biletave që doni të keni në dispozicion. Me një llogari, ju mund të blini deri në 4 bileta për një ndeshje. Nëse kërkesat dhe aplikimet tejkalojnë disponueshmërinë e biletave që i jepet si kuotë tifozëve shqiptarë, UEFA do të hedhë një short për të gjithë personat që kanë aplikuar si tifozë të Shqipërisë. Fituesit do të njoftohen me e-mail për të paguar biletat e tyre në janar të vitit 2024. Pasi të kryeni pagesën, ju do të merrni edhe konfirmimin që pagesa është kryer dhe bileta do të vijë në format elektronik vetëm në aplikacionin e UEFA-s (UEFA Mobile Tickets), që duhet ta keni të instaluar në telefonin tuaj”, thuhet në njoftim. UEFA bën me dije se biletat nuk do të shpërndahen tani, por gjatë muajve në vazhdim. “Kur biletat të jenë të disponueshme brenda aplikacionit, ju do të informoheni me e-mail.
Lexo edhe:
Ky e-mail do të përmbajë gjithashtu edhe një shpjegim të shkurtër të se si funksionon aplikacioni”, vijon njoftimi. Shorti i turneut final të UEFA EURO 2024 hidhet të shtunën, më 2 dhjetor në Gjermani dhe Shqipëria do të njohë grupin dhe kundërshtarët e saj në këtë kompeticion. Kombëtarja shqiptare është e pozicionuar në vazon e dytë të UEFA-s, pas rezultateve fantastike në këtë fushatë eliminatore dhe renditjes në vendin e parë në grupin E me 15 pikë.
