Gazetari i kronikës, Sokol Bregu, ka dhënë detaje për vrasjen e Gëzim Sinamatit në qytetin e Vlorës disa javë më parë. Bregu theksoi dje në një media se zbardhja e këtij krimi nuk do të jetë një punë e lehtë për policinë, pasi sipas tij autorët nuk kanë lënë asnjë gjurmë, qoftë ADN, gëzhoja apo mjet të djegur. “Pushka nuk u dogj, çdo gjë është në dorën e autorit të krimit. Dyshime ka pafund se inteligjenca policore në këtë konflikt kishte materiale sekrete të ruajtura për kohë të gjatë, të bollshme në rastin konkret. Gjithsesi nuk provoheshin dot në vendin e ngjarjes. Vrasjet me snajper në Shqipëri nga një largësi e madhe ndodhin rrallë, se nuk ka ende persona që e kanë këtë aftësi, por ja që gjenden. Asnjë vrasje me snajper në Shqipëri nuk është zbardhur, sepse nuk lë prova. Por policia i ka dyshimet e saj. Edhe nga infot që kishte mbledhur, në pjesën e parë të hetimit çdo gjë që u lidh me një sasi të konsiderueshme droge të humbur në Gjermani, prej 500 mijë eurosh mes grupeve në Vlorë. Pista është dhe ndonjë hakmarrje e mundshme por ende nuk ka siguri dhe aq më tepër të jetë gjendur ekzekutori fizik. Policia është në alert prej kësaj vrasjeje”, deklaroi Bregu. Kujtojmë se Gëzim Sinomati është djali i Sokol Sinomatit, i njohur me nofkën “Buzderi” dhe si anëtar i bandës së Gazmend Brakës alias “Gaxhai”, në vitin 1997 në Vlorë. Sokol Sinomati u arratis nga burgu i Peqinit në vitin 2017. Asokohe, ai mori leje, por nuk u kthye më në qeli. Në vitin kur ai u arratis, Sokol Sinomataj vazhdonte të vuante dënimin per vrasjen e Elton Tatos dhe plagosjen e Robert Borakut, ngjarje që sipas vendimit të gjykatës së Vlorës, ka ndodhur në 26.06.2002. Gjithashtu, në vitin 2022, xhaxhit të 23-vjeçarit, po ashtu person me precedent penalë, i është vënë tritol në makinë.
Atentati i “Don Boskos”
Ndërkohë për herë të parë emisioni “Në shënjestër” do të përpiqet edhe njëherë nëpërmjet fakteve të reja, të hedhë dritë mbi këtë ngjarje kriminale dhe përfshirjen e Kasandër Nogës dhe nipit të tij Kevin Zeneli (Suçi) në këtë ngjarje të rëndë kriminale. Si njerëzit e Kasandër Nogës i ndoqën vëllezërit Hasanbelli dhe nipat e tyre? Dhe pse ata gabuan shënjestër dhe qëlluan mbi persona që nuk kishin lidhje me hasmin e tyre të vjetër? Por siç rezultoi më pas, dhe që tashmë është e njohur, viktima Erjon Çela një shitës produktesh duhani pranë lokalit ku po pinte kafe dhe miqtë e tij në tavolinë, ishin objektivi i ngatërruar i atentatit. Në fokus të personave që qëlluan nuk ishin ata, por Erjon Hasanbelli dhe nipat e tij, të cilët në atë moment nuk ndodheshin në lokal, pavarësisht se ai ishte bari ku ata shikoheshin shpesh të frekuentonin. Ai që u bë i penduari i parë i kësaj ngjarje dhe rrëfeu planin për të vrarë vëllezërit Hasanbelli dhe nipat e tij, ishte Indrit Beqiraj. Ai i tregoi para grupit hetues se ai dhe vëllai i tij Gentjani, ishin paguar nga Kasandër Noga, nëpërmjet nipit të tij Kevin Zeneli (Suçi) për të vrarë fillimisht shtetasin Geron Hasanbelli dhe në mungesë të tij vëllain Erjonin, ose nipat e tyre. Rrëfimi i Indrit Beqiraj, lidhur mbi masakrën e ‘Don Boskos’ dhe përfshirjen në këtë krim të Kasandër Nogës, erdhi pas një tjetër ngjarje, ku Indriti dhe vëllai i tij Gentjani ishin marrë peng nga një tjetër personazh i rëndësishëm i krimit në Durrës, për të cilin ata ishin paguar për ta ndjekur nga pas dhe për ta vrarë, kundrejt pagesës. Ashtu sikur ishin rekrutuar edhe për të vrarë vëllezërit Hasanbelli dhe nipat e tij, po kundrejt pagesës, nga Kasandër Noga dhe nipi i tij Kevin Zeneli (Suçi). Sipas vëllezërve Beqiraj, personi i parë që i kishte kontaktuar për të vrarë Geron Hasanbelli, ishte Ilirian Feçi, i cili i kishte ofruar 100 mijë euro për ta kryer këtë vrasje, të cilën sipas tij e kërkonte me çdo kusht Kasandër Noga. Por ndërsa vëllezërit Beqiraj, nuk kishin mundur ta kryenin këtë vrasje, një ditë ata shikojnë në televizor, se puna që kishin marrë përsipër, ishte kryer nga një tjetër grup kriminal. Por, në vend të objektivit të vërtetë të atentatit, ishin vrarë persona të tjerë të pafajshëm. Indrit Beqiraj tha më tej se ai u përpoq të lidhej që nga ai moment me Kevin Zenelin, por kjo telefonatë ishte e pamundur, pasi Kevini e kishte telefonin të fikur. Ndërkohë që ai vetë filloi të dyshonte fort se autorësinë e krimit të ‘Don Boskos’ e kishte marrë përsipër dikush tjetër ose Kevini ia kishte dhënë një vrasësi të ndryshëm me pagesë. Edhe pse nuk po kuptonte se përse nuk ishin vrarë objektivat që atij i ishin dhënë më herët nga Kevini dhe Kasandër Noga, por emra të tjerë për të cilët nuk ishte folur më parë. Ndërkohë, ata u takuan së bashku dy ditë më pas, ku Indriti e pyeti për atë çfarë kishte ndodhur.
Lexo edhe:
Ilir Kupës i rrëzohet kërkesa, mbetet i izoluar në “41 Biss”
Nga ana tjetër, Gjykata e Posaçme ka rrëzuar kërkesën e Albert alias Ilir Kupës, një nga anëtarët e bandës së “babagjyshërve”, për daljen nga regjimi i posaçëm “41 biss”. Kupa u fut në këtë regjim dhjetorin e kaluar me urdhër të ministrit të Drejtësisë, Ulsi Manja pasi në qeli iu gjetën në qeli një orë e tipit “Smart Watch”, si dhe një aparat celular. Kupa ka pretenduar se orën e kishte futur me komision e drejtorisë së burgjeve në ambientin ku vuan dënimin dhe e përdorte për të matur hapat. Por ndryshe pretendojnë autoritetet, të cilat kanë dyshime se i dënuari me 25 vite burg mbante kontakt me jashtë. Ilir Kupa u dënua nga Krimet e Rënda me 25 vite burg për 6 vepra penale, që kanë të bëjnë me një sërë për grabitjesh. Ai njihet për ngjarjen e rëndë në burgun e Trikallasë në Greqi në vitin 2013, kur u arratis me bujë duke sjellë një sërë shkarkimesh në sistemin e burgjeve atje. Banda e “Babagjyshëve” në Shqipëri ka realizuar një sërë grabitjesh, ku spikat ajo e vjedhjes së një qendre tregtare në prag të vitit të Ri, ku disa persona të veshur si Babagjyshë u futën me armë në një argjendari dhe morën me vete florinj. Grupi përbëhej nga 11 persona të cilët morën emrin “Banda e babagjyshëve”. Ata ishin: Ilir Kupa; Fatmir Pjetri; Agustin Sula; Julian Qerushi; Dritan Kola; Saimir Kala; Mark Shpendi; Hajdar Sefa; Lin Kala; Edmond Selala dhe Angjelin Ndreka.
