Një i ri është vrarë pak pas mesnatës së kaluar në Shkodër. Ngjarja e rëndë ndodhi në fshatin Bardhaj, teksa viktimë ka mbetur 25-vjeçari me iniciale E.N., banues në Bleran Bardhaj.
Brenda pak minutash policia ka arrestuar autorin e dyshuar të krimit, shtetasin Mark Kodra, 47 vjeç, bashkëfshatar me viktimën, teksa ka sekuestruar dhe armën e krimit, tip kallashnikov.
“Në fshatin Bardhaj, në afërsi të një kalçetoje, dyshohet se një konflikti për motive të dobëta shtetasi Mark Kodra., 47 vjeç, banues ne fshatin Bleran Bardhaj, ka vrarë me armë zjarri shtetasin Emiljano Ndou, 25 vjeç, banues ne Bleran Bardhaj.
Falë reagimit në kohë dhe veprimeve të shpejta e profesionale të kryera nga Policia, u bë e mundur identifikimi dhe kapja brenda pak minutash e autorit të dyshuar të vrasjes.
Grupi hetimor nën drejtimin e Prokurorisë po punon për sqarimin e rrethanave dhe dokumentimin e plotë të kësaj ngjarjeje”, bëri të ditur Policia e Shkodrës.
E ndërsa zona është rrethuar nga forca të shumta policie, sapo morën vesh lajmin në vendin ku ndodhi krimi arritën me shpejtësi familjarët e të riut që humbi jetën.
E motra në lot, dëgjohet teksa u lutet efektivëve të policisë që ta lejojnë që të futet për të parë vëllanë. “A ban me e pa? O Zo, o Zot…” dëgjon britmat e motrës së viktimës në lot.
