Edon Zhegrova ka bërë prezantimin e parë si lojtar i Juventusit, pas transferimit nga Lille në ditën e fundit të merkatos.
Sulmuesi i Kosovës u shfaq i lumtur për këtë hap të madh në karrierë dhe u shpreh se është gati të japë kontributin e tij për bardhezinjtë.
“Jam shumë i lumtur që jam te Juventusi. Ndihem shumë krenar. Këto ditët e para kanë qenë fantastike. Gjithmonë kam dashur të arrija në një klub të madh… Mendoj se kjo skuadër ka shumë cilësi, jam i bindur se mund të jap kontributin tim,” tha Zhegrova.
Lexo edhe:
Ai konfirmoi se nuk do të jetë i gatshëm për ndeshjen derbi ndaj Interit, pasi është ende në proces rikuperimi nga një dëmtim, por theksoi se po punon fort me stafin për të qenë në formë sa më shpejt.
Mes të tjerash, Zhegrova tregoi se ka marrë mesazhe urimi nga kryeministri Edi Rama, një tifoz i madh i Juventusit, i cili sipas tij është shprehur krenar për këtë transferim.
“Është një tifoz i madh i Juventusit. Ishte shumë i kënaqur dhe krenar që erdha këtu, më ka ndihmuar shumë me pasaportën shqiptare. Me shumë mundësi do t’i jap një fanellë timen të Juventusit”, tha Zhegrova.
Juventusi ka paguar rreth 20 milionë euro për kartonin e sulmuesit, që pritet të bëhet një nga pikat e forta të skuadrës së trajnerit Tudor në sezonin e ri.
