Një histori prekëse që po bën xhiron e rrjeteve sociale dhe mediave greke, por tani Ledian Goga, shqiptari që u hodh në lumin Arahthos për të shpëtuar dy djemtë e mitur, Nisin dhe Spiron, të cilët humbën tragjikisht jetën, ka vendosur të mos i harrojë kurrë.
Edhe pse nuk arriti t’i shpëtonte, Lediani mbajti një premtim të dhënë pas tragjedisë. Në nderim të dy fëmijëve, ai bëri një tatuazh ku shfaqet vetë me krahë engjëlli, duke mbajtur në krahët e tij dy djemtë – edhe ata me krahë engjëlli. Poshtë secilit figurojnë emrat e tyre: Nisi dhe Spiros.
“E bëra sepse i dua si të ishin fëmijët e mi,” tha ai në një video në TikTok, ku tregon tatuazhin e realizuar nga @Kns__tattooist.
Lexo edhe:
Pas këtij akti të jashtëzakonshëm human, Lediani është bërë simbol i kurajos në opinionin grek. Ministri i Brendshëm i Greqisë e ka kontaktuar personalisht dhe i ka premtuar dhënien e nënshtetësisë greke. “Më tha: ‘Të pres në zyrë, të përqafoj dhe të jap nënshtetësinë’. Por unë nuk e bëra për këtë. Jam në Greqi që 17 vjeç, tani jam 41. Kam jetuar gjithë jetën këtu. Greqia është vendi im i dytë.”
Ledian Goga tha se veproi instinktivisht për të shpëtuar fëmijët. “S’e mendova dy herë. I pashë në ujë dhe hyra si të ishin të mitë. Më ka marrë në telefon e gjithë Greqia.”
Dy fëmijët, përfshirë një shqiptar, nuk arritën të mbijetojnë dhe pësuan vdekje klinike. Prindërit e tyre morën një vendim të jashtëzakonshëm: dhuruan organet e djemve, duke u dhënë jetë të tjerëve.
