Përmes avokatit të tij, ish-presidenti i Kosovës, Hashim Thaçi, ka shprehur mirënjohjen e tij për mbështetjen, siç e ka cilësuar ai, të jashtëzakonshëm që ai, Kadri Veseli, Rexhep Selimi dhe Jakup Krasniqi kanë marrë nga qytetarët e Kosovës dhe nga mbështetësit ndërkombëtarë.
Ai gjithashtu ka apeluar te qytetarët ta ruajnë qetësinë pas vendimit dënues të Dhomave të Specializuara të Kosovës në Hagë ndaj ish-krerëve të UÇK-së.
Me një shënim në “X”, avokati i ish-presidentit të Kosovës, Hashim Thaçi, Luka Mishetiç, u shpreh se do ta apelojnë vendimin.
Lexo edhe:
Sipas tij, mbrojtja pretendon se gjatë procesit gjyqësor dhe në aktgjykimin e shkallës së parë janë bërë gabime të rëndësishme ligjore dhe faktike, të cilat, sipas saj, kanë ndikuar në drejtësinë e procesit.
Mishetiç ka thënë se mbrojtja gjatë gjithë procesit ka ngritur shqetësime për mënyrën se si është zhvilluar gjykimi, veçanërisht për pyetjet që anëtarët e Trupit Gjykues u kanë bërë drejtpërdrejt dëshmitarëve dhe palëve.
Sipas mbrojtjes, këto ndërhyrje kanë qenë të tilla që kanë krijuar dyshime për paanshmërinë e trupit gjykues.
”Hashim Thaçi dëshiron të shprehë mirënjohjen e tij të sinqertë për mbështetjen e madhe që ai, Kadri Veseli, Rexhep Selimi dhe Jakup Krasniqi kanë marrë nga populli i Kosovës dhe nga komuniteti ndërkombëtar. Ai u bën thirrje qytetarëve të Kosovës që të ruajnë qetësinë në reagimin e tyre ndaj padrejtësisë së djeshme.
Avokatët e z. Thaçi do të apelojnë aktgjykimin e djeshëm të Trupit Gjykues pranë Panelit të Apelit të Dhomave të Specializuara të Kosovës (DHSK), duke argumentuar se janë bërë gabime të rëndësishme në interpretimin e ligjit dhe në vlerësimin e fakteve, të cilat kanë cenuar drejtësinë e procesit gjyqësor.
Gjatë gjithë procesit gjyqësor, Mbrojtja ka ngritur vazhdimisht shqetësime lidhur me respektimin e rregullave procedurale dhe të drejtën për një proces të drejtë, përfshirë shtrirjen e gjerë të pyetjeve të bëra drejtpërdrejt nga anëtarët e Trupit Gjykues, në një mënyrë që, sipas Mbrojtjes, nuk krijonte përshtypjen e paanshmërisë.
Mbrojtja qëndron në qëndrimin se ndërhyrjet e gjyqtarëve kanë tejkaluar kufijtë e kërkimit neutral të së vërtetës, duke cenuar perceptimin e paanshmërisë që kërkohet nga standardet ndërkombëtare të drejtësisë. Sipas saj, kjo mungesë paanshmërie është reflektuar tashmë edhe në aktgjykimin e Trupit Gjykues.
Mbrojtja argumenton se konstatimet e fajësisë përtej çdo dyshimi të arsyeshëm mbështeten në prova të pamjaftueshme dhe të pakonfirmuara nga prova të tjera.
Për më tepër, gjatë ditës së djeshme, Trupi Gjykues deklaroi publikisht se z. Thaçi ishte i përfshirë në vrasjen e Behajdin Allaqit, pasi më herët kishte urdhëruar të gjitha palët në këtë çështje që të mos diskutonin publikisht rastin e z. Allaqi gjatë seancave gjyqësore, si dhe kishte urdhëruar që të gjitha provat që lidhen me këtë çështje të mbaheshin konfidenciale.
Sipas Mbrojtjes, Trupi Gjykues e ka shpallur publikisht fajtor z. Thaçi për një vrasje, ndërkohë që provat mbi të cilat është mbështetur ky përfundim janë mbajtur të fshehura nga shqyrtimi publik. Z. Thaçi do ta mirëpriste një shqyrtim të tillë publik të provave.
Mbrojtja do të apelojë vendimet e Trupit Gjykues, duke argumentuar se ato kanë shkelur të drejtat e tij themelore për një proces të drejtë, të garantuara nga Konventa Evropiane për të Drejtat e Njeriut dhe Kushtetuta e Kosovës.
Z. Thaçi mohon në mënyrë të prerë çdo përfshirje në vrasje.
Respektimi i standardeve rigoroze të drejtësisë procedurale është thelbësor për ruajtjen e besimit të publikut te institucionet ndërkombëtare të drejtësisë penale. Mbrojtja do të paraqesë zyrtarisht njoftimin për apel pranë Panelit të Apelit, me qëllim korrigjimin e këtyre gabimeve faktike, ligjore dhe procedurale”, thuhet në reagim.
