Shqipëria ka shpallur të shtunën ditë zie kombëtare në nderim të ndarjes nga jeta të Papa Françeskut. Në të gjitha institucionet publike, flamujt janë ulur në gjysmështizë.
Për shkak të kësaj dite zie, janë ndryshuar edhe axhendat elektorale. Partia Socialiste ka shtyrë të gjitha aktivitetet që kishte planifikuar në qarkun e Fierit për zgjedhjet parlamentare. Nga ana tjetër, kryetari i PD-së, Sali Berisha, bëri të ditur një ditë më parë se do të vazhdojë me takimet elektorale, por secili takim do të nisë me një minutë heshtje dhe nuk do të shoqërohet me muzikë.
Në ceremoninë mortore të Papa Françeskut, Shqipëria përfaqësohet nga një delegacion i lartë: Presidenti Bajram Begaj me bashkëshorten, ministri i Jashtëm Igli Hasani, ministrja e Arsimit Adea Pirdenji, ambasadorja në Vatikan Majlinda Frangaj, si edhe krerët e komuniteteve fetare në Shqipëri: Arjan Dodaj (Kisha Katolike), Bujar Spahiu (Komuniteti Mysliman), Haxhi Dede Edmond Brahimaj (Kryegjyshi i Bektashinjve) dhe Kryepeshkopi ortodoks Joani.
