TIRANË – Kryeministri Edi Rama ka reaguar ashpër ndaj zaptimit të hapësirave publike në zonën e “21 Dhjetorit” në kryeqytet, duke e quajtur situatën një shembull klasik të fenomenit të njohur si “tokë e xanun”.
Përmes një postimi në rrjetet sociale, Rama paralajmëroi se kushdo që ka uzurpuar hapësira të përbashkëta me tavolina, frigoriferë, mure apo struktura të tjera të paligjshme, dhe nuk i largon ato vullnetarisht, do të përballet jo vetëm me gjoba, por edhe me ndjekje penale.
“Situatë klasike ‘tokë të xanun’ në Tiranë, tek 21 Dhjetori – kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, që nga tavolinat dhe frigoriferët në trotuarë e deri tek muret apo trarët e ‘doganave’ rreth pallateve, do të ballafaqohet jo vetëm me gjobat përkatëse, por edhe me ndjekjet përkatëse penale,” shkruan Kryeministri.
Ai e konsideroi këtë sjellje si shkatërrim të pronës publike dhe cënim të sigurisë e shëndetit të qytetarëve, duke e krahasuar me krim mjedisor.
Lexo edhe:
Në përfundim të reagimit, Rama theksoi nevojën për ndërgjegjësim dhe solidaritet qytetar:
“Koha për t’u bërë bashkë që të gjithë në emër të bashkëjetesës në të njëjtën lagje; shumica duke marrë mbrapsht atë që i takon dhe pakica duke kthyer mbrapsht atë që nuk i takon!”
Ajo që të bie në sy në fakt, është edhe një hapësirë nga IQOS, ku sipas ligjit është e ndaluar reklamimi tyre.
Por, nga reagimi i Kryeministrit Rama kjo hapësirë është publike, duke berë që IQOS të shkelë dy herë ligjin.
Zaptimi i hapësirave publike në Tiranë është kthyer në një fenomen shqetësues, ndërsa autoritetet vendore në bashkëpunim me institucionet shtetërore kanë nisur ndërhyrjet për lirimin e tyre në disa zona të kryeqytetit.
